યુએઈમાં નિકાસ થતી 80% વસ્તુઓ થશે ટ્રેડ ફ્રી
અબતક, રાજકોટ
કરારથી આગામી પાંચ વર્ષમાં દ્વિપક્ષીય વેપાર 4.5લાખ કરોડથી વધીને 7.5લાખ કરોડે પહોંચવાનો અંદાજ
દુબઈ ફરી એક વખત ભારત માટે સોનાની મરઘી ઈંડા દેતી સાબિત થશે. કારણકે ભારત અને યુએઇ વચ્ચે આજે દ્વિપક્ષીય કરાર થવાનો છે. જેનાથી યુએઈમાં નિકાસ થતી 80 ટકા વસ્તુઓ ટ્રેડ ફ્રી થશે. કરારથી આગામી પાંચ વર્ષમાં દ્વિપક્ષીય વેપાર 4.5લાખ કરોડથી વધીને 7.5લાખ કરોડે પહોંચવાનો અંદાજ છે. વિશ્વના અન્ય દેશોમાં નિકાસ ઉપર ડ્યુટી બાધા રૂપ બની છે ત્યારે દુબઈના માર્કેટમાં પ્રવેશ કરી ભારતની પ્રોડક્ટ ત્યાંથી વિશ્વના ખૂણે ખૂણે છવાશે.
વિશ્ર્વના અન્ય દેશોમાં નિકાસ ઉપર ડ્યુટી બાધા રૂપ બની છે ત્યારે દુબઈના માર્કેટમાં પ્રવેશ કરી ભારતની પ્રોડક્ટ ત્યાંથી વિશ્ર્વના ખૂણે ખૂણે છવાશે.
દ્વિપક્ષીય મુક્ત વેપાર કરારના અમલીકરણ સાથે, ભારત તેના ઓછામાં ઓછા 80% ઉત્પાદનો યુએઈને ડ્યુટી-મુક્ત નિકાસ કરી શકશે. ભારત આગામી બે વર્ષમાં ટેક્સટાઇલ નિકાસ અને પ્લાસ્ટિક નિકાસ ત્રણ ગણું વધી 15000 કરોડ થઇ શકશે. સંયુક્ત આરબ અમીરાત અને ભારત આજે વ્યાપક આર્થિક ભાગીદારી કરાર પર હસ્તાક્ષર કરશે, સૂત્રોએ જણાવ્યું હતું.
5 લાખથી વધુ રોજગારીનું થશે સર્જન
ભારતના જેમ્સ અને જ્વેલરી, ટેક્સટાઇલ, એન્જિનિયરિંગ પ્રોડક્ટ્સ, ફાર્માસ્યુટિકલ્સ, મેડિકલ ઇક્વિપમેન્ટ, ઓટોમોબાઇલ, લેધર, સ્પોર્ટિંગ ગુડ્સ અને ફર્નિચર સેક્ટરમાં પણ 500,000થી વધુ નોકરીઓનું સર્જન થવાની અપેક્ષા છે. લગભગ તમામ સંવેદનશીલતાઓનું ધ્યાન રાખવામાં આવ્યું છે. તે બંને પક્ષો માટે વિન વિન પોઝિશન છે. યુએઈમાં લગભગ એક લાખ નોકરીઓનું સર્જન થવાની અપેક્ષા છે, તેવું એક અધિકારીએ જણાવ્યું હતું.
ભારતને ક્યાં લાભ મળશે?
ભારત તેના તાજા અને ફ્રોઝન બોવાઇન મીટ, ચીઝ, મસાલા, અમુક ઓર્ગેનિક કેમિકલ્સ અને પેપર પ્રોડક્ટ્સ માટે ડ્યુટી ફ્રી માર્કેટ એક્સેસ મેળવવા આતુર છે. યુનાઈટેડ આરબ અમીરાતમાં રમતગમતના સામાન અને ફર્નિચરની નિકાસ પર પણ શૂન્ય ડ્યુટી લાગી શકે છે, જ્યારે ભારતની પ્લાસ્ટિકની નિકાસ હાલમાં લગભગ 3135 કરોડથી વધીને 9750 કરોડ થઈ શકે છે. ઉદ્યોગે વોશિંગ મશીન, એસી, રેફ્રિજરેટર્સ, મસાલા, તમાકુ, સુતરાઉ કાપડ, કાપડ અને
ચામડા સહિત લગભગ 1,100 ઉત્પાદનોની ઓળખ કરી હતી, જેની નિકાસ તે કરાર દ્વારા વધારવા માંગે છે. સ્ત્રોત અનુસાર, સાદા અને સ્ટડેડ જેમ્સ અને જ્વેલરીની નિકાસ 2023 સુધીમાં વધીને 75000 કરોડ થવાની ધારણા છે અને તે પછીના પાંચ વર્ષમાં બમણી થઈ જશે.
જ્વેલરી નિકાસ પર 5% આયાત જકાત નાબૂદ કરવાની માંગ
ઉદ્યોગે ભારતથી યુએઈમાં સોના, ચાંદી અને પ્લેટિનમ જ્વેલરીની નિકાસ પર 5% આયાત જકાત નાબૂદ કરવાની માંગ કરી છે. કોવિડ-19 રોગચાળાને કારણે 2020-21માં આ માલની નિકાસ ઘટીને 8850 કરોડ થઈ ગઈ છે. ગયા વર્ષે ડિસેમ્બરમાં, યુએઈએ લાંબા સમયથી ચાલી રહેલી માંગને સ્વીકારીને ભારતમાંથી ઇંડા અને અન્ય પોલ્ટ્રી ઉત્પાદનોની આયાત પરનો પ્રતિબંધ હટાવી લીધો હતો. સીઈપીએ માટેની
વાટાઘાટો સપ્ટેમ્બર 2021 માં શરૂ કરવામાં આવી હતી, જે ગલ્ફ ક્ષેત્રમાં ભારતનો આવો પ્રથમ વેપાર સોદો છે. તે માલસામાન, સેવાઓ, મૂળના નિયમો, ડિજિટલ વેપાર, સરકારી પ્રાપ્તિ અને રોકાણ જેવા ક્ષેત્રોને આવરી લેવાની સંભાવના છે. યુએઈ ભારતનું ત્રીજું સૌથી મોટું વેપારી ભાગીદાર છે. છેલ્લા નાણાકીય વર્ષમાં તે લગભગ 2.17 લાખ કરોડની નિકાસ સાથે યુનાઇટેડ સ્ટેટ્સ પછી ભારતનું બીજું સૌથી મોટું નિકાસ સ્થળ હતું.
