પશ્ચિમી દેશોમાં મંદી અને ચીનમાં આર્થિક મંદીની આશંકા વચ્ચે ભારતીય અર્થવ્યવસ્થાએ બીજા ક્વાર્ટરમાં તમામ અંદાજોને વટાવીને 7.6 ટકાના દરે વૃદ્ધિ હાંસલ કરી છે. બીજી તરફ ઉત્પાદનમાં પણ ભારતે 27 મહિનાની ટોચ હાંસલ કરી છે. વિશ્વના મોટા દેશોની સરખામણીમાં ભારતનો જીડીપી સૌથી ઝડપથી વધ્યો છે. આ સમયગાળા દરમિયાન ચીનનો વિકાસ દર માત્ર 4.9 ટકા રહ્યો છે.
વિશ્વના મોટા દેશોની સરખામણીમાં ભારતનો જીડીપી સૌથી ઝડપથી વધ્યો, બીજા ક્વાર્ટરમાં ચીનનો વિકાસ દર માત્ર 4.9 ટકા જ રહ્યો
એપ્રિલથી સપ્ટેમ્બરના પ્રથમ છ મહિનામાં જીડીપીનો અંદાજ 7.7 ટકા વધીને રૂ. 82.11 લાખ કરોડ થયો છે, જે એક વર્ષ અગાઉ રૂ. 76.22 લાખ કરોડ હતો. 2022-23ના પ્રથમ અર્ધવાર્ષિક ગાળામાં તેણે 9.5 ટકાની વૃદ્ધિ નોંધાવી હતી. એપ્રિલ અને સપ્ટેમ્બર વચ્ચે વર્તમાન ભાવે આપણી અર્થવ્યવસ્થાનું કદ 142.33 લાખ કરોડ રૂપિયા હોવાનો અંદાજ છે. આ અંદાજ એક વર્ષ અગાઉના રૂ. 131.09 લાખ કરોડ કરતાં 8.6 ટકા વધુ છે. 2022-23માં સમાન સમયગાળામાં તેમાં 22.2 ટકાનો વધારો થયો હતો.
બીજી તરફ ચાલુ નાણાકીય વર્ષના બીજા ક્વાર્ટરમાં મેન્યુફેક્ચરિંગ સેક્ટરમાં જીવીએ વૃદ્ધિ દર 13.9 ટકા રહ્યો છે, જ્યારે એક વર્ષ અગાઉના સમાન ક્વાર્ટરમાં તે 3.8 ટકા ઘટ્યો હતો. હાલ મેન્યુફેક્ચરિંગ સેકટરની વૃદ્ધિ 27 મહિનાની ટોચે પહોંચી છે. હવે ભારતીય અર્થવ્યવસ્થા માટે આગળનું લક્ષ્ય 5 ટ્રિલિયન ડોલરના આંકડા સુધી પહોંચવાનું છે. પીએમ મોદીએ વર્ષ 2025 સુધીમાં દેશની અર્થવ્યવસ્થાને 5 ટ્રિલિયન ડોલર સુધી લઈ જવાનો લક્ષ્યાંક રાખ્યો છે.
આઠ મુખ્ય ઈન્ફ્રા સેક્ટરનો વિકાસ દર 12.1% રહ્યો
ઓક્ટોબરમાં આઠ મોટા ઈન્ફ્રા સેક્ટરની વૃદ્ધિ 12.1% હતી. એક વર્ષ પહેલા તે 0.7% વધ્યો હતો. સપ્ટેમ્બરમાં તેમનો વિકાસ દર 9.2% હતો. એપ્રિલથી ઓક્ટોબર દરમિયાન તે 8.6% હતો જે એક વર્ષ પહેલા 8.4% હતો. ઔદ્યોગિક ઉત્પાદન સૂચકાંકમાં તેમનું યોગદાન 40% છે.
રાજકોષીય ખાધ બજેટ લક્ષ્યના 45 ટકા રહી
એપ્રિલથી ઓક્ટોબર સુધીમાં દેશની રાજકોષીય ખાધ રૂ. 8.03 લાખ કરોડ હતી. આ સરકારના આખા વર્ષના બજેટ લક્ષ્યના 45 ટકા છે. ગયા વર્ષે તે 45.6 ટકા હતો. 2023-24 માટે, સરકારે રાજકોષીય ખાધનું લક્ષ્ય 17.86 લાખ કરોડ રૂપિયા અથવા જીડીપીના 5.9 ટકા નક્કી કર્યું છે. સરકારી ખર્ચ અને આવક વચ્ચેના તફાવતને રાજકોષીય ખાધ કહેવામાં આવે છે. કુલ આવકમાંથી રૂ. 13.02 લાખ કરોડ ટેક્સ અને રૂ. 2.66 લાખ કરોડ નોન-ટેક્સ હતા. આરબીઆઈએ સરકારને રૂ. 87,416 કરોડ આપવાની મંજૂરી આપી હોવાને કારણે કર સિવાયની આવકમાં વધારો થયો હતો.
