ગોંડલ ચોકડીએ એસટીની જગ્યાએ જ ખાનગી બસોને પણ ઉભી રાખવાની છૂટ અપાઈ

ટ્રાફિક નિવારવા સંકલન બેઠકમાં મહત્વનો નિર્ણય

સાંસદ, ધારાસભ્યોની ઉપસ્થિતિમાં અને જિલ્લા કલેકટરની અધ્યક્ષતામાં રાજકોટ જિલ્લા ફરિયાદ સહ સંકલન સમિતિની બેઠક યોજાઈ

ઉપલેટાના ભીમોરા ગામે ચેક ડેમ રિપેરીંગ માટે અઢી કરોડ રૂપિયા બે વર્ષથી મંજુર થઈ ગયા, કોન્ટ્રાક્ટ પણ અપાય ગયો છતાં હજુ કામ શરૂ ન થતા તડાફડી બોલી

સંસદ સભ્ય રામભાઈ મોકરીયા તથા ધારાસભ્યો ડો. મહેન્દ્ર પાડલીયા, દર્શિતાબેન શાહ અને રમેશ ટીલાળાની ઉપસ્થિતિમાં અને જિલ્લા કલેકટર પ્રભવ જોશીની અધ્યક્ષતામાં રાજકોટ જિલ્લાની ફરિયાદ સહ સંકલન સમિતિની બેઠક યોજાઈ હતી. જેમાં ગોંડલ ચોકડીએ એસટીની જગ્યાએ જ ખાનગી બસોને પણ ઉભી રાખવાની છૂટ અપાઈ છે.

બેઠકના પ્રારંભે નિવાસી અધિક કલેક્ટર  એસ. જે. ખાચરે બેઠકમાં ઉપસ્થિત સૌ સભ્યોને આવકાર્યા હતા. જિલ્લા વિકાસ અધિકારી દેવ ચૌધરીએ આગામી 22 નવેમ્બરથી રાજકોટ જિલ્લાના ગ્રામ્ય વિસ્તારોમાં યોજાનારી “વિકસિત ભારત સંકલ્પ યાત્રા”નું સુચારૂ આયોજન કરવા અને કેન્દ્ર સરકારની વિવિધ યોજનાઓની માહિતી છેવાડાના ગામડાઓ સુધી પહોંચાડવા પર ભાર મુક્યો હતો. મહાનગરપાલિકા વિસ્તારમાં પણ આ યાત્રા અન્વયે રાજ્ય સરકારની વિવિધ યોજનાઓના લાભો સંબંધિતોને પહોંચાડવા અંગે આ બેઠકમાં ચર્ચા કરાઈ હતી. ધારાસભ્ય દર્શિતાબેન શાહે રૂડા વિસ્તારના માર્ગો, રાજકોટ-અમદાવાદ હાઈવે, એઈમ્સ હોસ્પિટલ ખાતે બસ સ્ટેન્ડ, શહેરની વિવિધ સરકારી હોસ્પિટલ્સની વિવિધ કામગીરી વગેરે અંગે રજૂ કરેલા પ્રશ્નોનો સત્વરે ઉકેલ લાવવા કલેક્ટરએ ઉપસ્થિતોને સુચના આપી હતી.

ધારાસભ્ય ડો. પાડલીયાએ ધોરાજી તથા ઉપલેટા નગરપાલિકા વિસ્તારમાં સિંચાઈનુ પાણી તાત્કાલિક છોડવા, ઉપલેટા નગરપાલિકા હસ્તકની એનિમલ હોસ્ટેલ, ગટરના પાણીના યોગ્ય નિકાલ તથા ભીમોરાના ચેકડેમનું સત્વરે સમારકામ કરવા અંગે રજૂઆત કરી હતી, જેનું નિયત સમય મર્યાદામાં નિરાકરણ લાવવા કલેક્ટરએ સંબંધિત સરકારી વિભાગોના અધિકારીઓને સૂચના આપી હતી. ઉપરાંત તેઓએઉપલેટાના ભીમોરા ગામે ચેક ડેમ રિપેરીંગ માટે અઢી કરોડ બે વર્ષથી મંજુર થઈ ગયા છે. જેનો કોન્ટ્રાક્ટ પણ અપાય ગયો છે. છતાં હજુ કામ શરૂ થયું ન હોય તે મુદ્દે તડાફડી બોલાવી હતી.

ધારાસભ્ય રમેશભાઈ ટીલાળાએ રાજકોટ ખાતે સ્થપાનારા ટેકનિકલ સેન્ટર માટે 30 એકર જમીન ફાળવવા બદલ કલેકટર પ્રભવ જોશીની સરાહના કરી હતી. અને ઉમેર્યું હતું કે સૌરાષ્ટ્રના વિકાસ માટે આ સેન્ટર સીમાચિન્હરૂપ સાબિત થશે. વધુમાં તેઓએ ગોંડલ ચોકડીએ ક્રિષ્ના પાર્ક પાસે પુલની નીચે એસટી બસ માટે જે જગ્યા ફાળવી હતી ત્યાં જ ખાનગી બસો પણ ઉભી રાખવા રજુઆત કરી હતી. જેથી ટ્રાફિક પ્રશ્ન નિવારી શકાય. ટ્રાફિક પ્રશ્ન નિવારવા માટેના આ સૂચનને સંકલનમાં લીલીઝંડી મળી હતી. આ ઉપરાંત ધારાસભ્યએ સૂચિત સોસાયટીનો પણ પ્રશ્ન ઉઠાવ્યો હતો.

કલેકટર કચેરી ખાતે યોજાયેલી આ બેઠકમાં મતદાર યાદી સંક્ષિપ્ત સુધારણાના કેમ્પ શહેરી વિસ્તારોમાં યોજવા અંગે, શ્રમિક અન્નપૂર્ણા યોજનાના નવા કેન્દ્રો શરૂ કરવા અંગે, ગંભીર રોગો અંગેના નિ:શુલ્ક નિદાન અને સારવાર કેમ્પ યોજવા અંગે પણ આ બેઠકમાં સમીક્ષા કરવામાં આવી હતી.આ બેઠકમાં રાજકોટ જિલ્લા ગ્રામ્ય પોલીસ અધિક્ષક જયપાલસિંહ રાઠોડ,પ્રાંત અધિકારીઓ સર્વ કે. જી. ચૌધરી, જે.એન. લીખીયા, રાજેશ આલ, સંદીપ વર્મા, જિલ્લા ગ્રામ વિકાસ એજન્સીના નિયામક  આર.એસ ઠુંમર, ડી. સી. પી. ભાર્ગવ પંડ્યા, નાયબ જિલ્લા વિકાસ અધિકારી મહેશ નાકિયા, પંડિત દીનદયાલ ઉપાધ્યાય હોસ્પિટલના ડીન ડો. આર. એસ. ત્રિવેદી, મુખ્ય જિલ્લા આરોગ્ય અધિકારી ડો. એન. એમ. રાઠોડ, એક્ઝિક્યુટિવ એન્જિનીયર કે.એન.ઝાલા, જિલ્લા ઉદ્યોગ કેન્દ્રના જનરલ મેનેજર કે. વી. મોરી, પ્રાદેશિક વાહન વ્યવહાર અધિકારી કેતન ખપેડ, મહિલા અને બાળ વિકાસ અધિકાર અવનીબેન દવે, જિલ્લા પુરવઠા અધિકારી રાજેશ્રીબેન વંગવાણી, અનુસૂચિત જાતિ વિભાગના નાયબ નિયામક આનંદબા ખાચર તથા સમિતિના અન્ય સભ્યો ઉપસ્થિત રહ્યા હતા.