સુરક્ષાની સ્થિતિ, આતંકવાદી ખતરો અને કેન્દ્ર અને રાજ્યની એજન્સીઓ વચ્ચે સંકલન પર મોટી ચર્ચા થવાની શક્યતા
કેન્દ્રીય ગૃહમંત્રી અમિત શાહ આજે ઈન્ટેલિજન્સ બ્યુરો એટલે કે આઈબીના અધિકારીઓ સાથે બેઠક યોજી રહ્યા છે. અહેવાલ છે કે આ બેઠક દિવસભર ચાલી શકે છે, જેમાં દેશની સુરક્ષા સ્થિતિ, આતંકવાદી ખતરો અને કેન્દ્ર અને રાજ્યની એજન્સીઓ વચ્ચે સંકલન પર મોટી ચર્ચા થઈ શકે છે. ખાસ વાત એ છે કે ગત સપ્ટેમ્બરમાં એનઆઈએ સહિત અનેક એજન્સીઓએ પોપ્યુલર ફ્રન્ટ ઓફ ઈન્ડિયા વિરુદ્ધ મોટી કાર્યવાહી કરી હતી, જેમાં સેંકડો કાર્યકરો અને નેતાઓની ધરપકડ કરવામાં આવી હતી.સમાચાર અનુસાર, આ બેઠક શહેરના એક ગુપ્ત સ્થાન પર સવારે 11 થી સાંજે 5 વાગ્યાની વચ્ચે યોજાઈ રહી છે.
એજન્સી સાથે વાત કરતા ગૃહ મંત્રાલયના એક વરિષ્ઠ અધિકારીએ જણાવ્યું હતું કે, “ગૃહમંત્રી દેશમાં મજબૂત આંતરિક સુરક્ષા સુનિશ્ચિત કરવા માટે સમગ્ર સુરક્ષા વ્યવસ્થા, ગુપ્ત માહિતી એકત્ર કરવાના નેટવર્ક અને અન્ય પાસાઓ પર ચર્ચા કરશે.” આ બેઠક દરમિયાન આતંકવાદના સતત ખતરા, વૈશ્વિક આતંકવાદી જૂથો, આતંકવાદને ફંડિંગ, નાર્કો આતંકવાદ, ગુનાહિત સાંઠગાંઠ, સાયબર સ્પેસનો દુરુપયોગ, આતંકવાદી લડવૈયાઓની ગતિવિધિઓ પર ચર્ચા થઈ શકે છે. ગુપ્તચર મુદ્દાઓ સાથે સંબંધિત દેશભરમાંથી ઘણા વરિષ્ઠ અધિકારીઓ બેઠકમાં ભાગ લઈ શકે છે. કેન્દ્રીય ગૃહ સચિવ અજય ભલ્લા અને આઈડી વડા તપન ડેકા પણ બેઠકમાં હાજરી આપશે.
