ભારતીયોએ ઈરાન અને ઈઝરાયેલની યાત્રા ન કરવી જોઈએ : વિદેશ મંત્રાલય

• ભારતીય દૂતાવાસોનો સંપર્ક કરે અને પોતાનું રજીસ્ટ્રેશન કરાવે. તમારી સલામતી વિશે અત્યંત સાવચેત રહો અને તમારી પ્રવૃત્તિઓને મર્યાદિત કરવાનો પ્રયાસ કરો.

National News : ભારત સરકારે ઈરાન અને ઈઝરાયેલને લઈને ટ્રાવેલ એડવાઈઝરી જાહેર કરી છે. સરકારે કહ્યું છે કે પ્રદેશની વર્તમાન પરિસ્થિતિને ધ્યાનમાં રાખીને, તમામ ભારતીયોને સલાહ આપવામાં આવે છે કે તેઓ આગળની સૂચના સુધી ઈરાન અથવા ઈઝરાયેલની યાત્રા ન કરે.

એડવાઇઝરીમાં શું કહ્યું

ભારત સરકારે ઈરાન અને ઈઝરાયેલને લઈને ટ્રાવેલ એડવાઈઝરી જાહેર કરી છે. વિદેશ મંત્રાલયે કહ્યું છે કે આ ક્ષેત્રની વર્તમાન સ્થિતિને જોતા તમામ ભારતીયોને સલાહ આપવામાં આવે છે કે તેઓ આગામી સૂચના સુધી ઈરાન અથવા ઈઝરાયેલની યાત્રા ન કરે. આ સાથે ઈઝરાયેલ અથવા ઈરાનમાં રહેતા લોકોને વિનંતી કરવામાં આવી છે કે તેઓ ત્યાંના ભારતીય દૂતાવાસોનો સંપર્ક કરે અને પોતાનું રજીસ્ટ્રેશન કરાવે. તમારી સલામતી વિશે અત્યંત સાવચેત રહો અને તમારી પ્રવૃત્તિઓને મર્યાદિત કરવાનો પ્રયાસ કરો.

Travel advisory for Iran and Israel:https://t.co/OuHPVQfyVp pic.twitter.com/eDMRM771dC

— Randhir Jaiswal (@MEAIndia) April 12, 2024

શા માટે જાહેર કરી એડવાઇઝરી

હકીકતમાં દાયકાઓથી કટ્ટર હરીફ રહેલા ઈરાન અને ઈઝરાયેલ આમને-સામને છે. દૂતાવાસ પર હુમલા બાદ ઈરાન યુદ્ધ માટે સંપૂર્ણપણે તૈયાર છે. ઈરાન આ હુમલા માટે ઈઝરાયેલને જવાબદાર માની રહ્યું છે જ્યારે ઈઝરાયેલ તેનો ઈન્કાર કરી રહ્યું છે. માનવામાં આવી રહ્યું છે કે ઈરાન આગામી 24થી 48 કલાકમાં ઈઝરાયેલ પર હુમલો કરી શકે છે. ઈસ્લામિક રિવોલ્યુશનરી ગાર્ડ કોર્પ્સ (IRGC) ના કમાન્ડર અને તેના કેટલાક સભ્યો 1 એપ્રિલના રોજ દૂતાવાસ પર થયેલા હુમલામાં માર્યા ગયા હતા. જે બાદ બંને દેશો વચ્ચે તણાવ ચરમસીમાએ પહોંચી ગયો હતો.

વિદેશી મીડિયા વોલ સ્ટ્રીટ જર્નલના રિપોર્ટ અનુસાર ઈરાન પહેલા ઈઝરાયેલની સરહદોને નિશાન બનાવી શકે છે. હાલમાં બંને દેશોની સેના સંપૂર્ણ એલર્ટ મોડ પર છે. ઈરાન તરફથી હુમલાની શક્યતાને જોતા અમેરિકા પણ એલર્ટ પર છે. ઈરાનમાં જ્યારે હુમલો થયો ત્યારે તેના પ્રમુખ ઈબ્રાહિમ રાઈસીએ કહ્યું હતું કે તેઓ હુમલાનો જવાબ આપશે. આ હુમલામાં ઈરાનના રિવોલ્યુશનરી ગાર્ડના સાત અધિકારીઓ સહિત 13 લોકો માર્યા ગયા હતા. જેમાં વરિષ્ઠ જનરલ મોહમ્મદ રઝા ઝાહેદી અને તેમના નાયબનો સમાવેશ થાય છે.