સર્વેશ્વર ચોકમાં સરાજાહેર હુમલો થતાં ટોળેટોળા એકઠા થયા
કાલાવડ રોડ પર આવેલા વિષ્ણુ વિહાર સોસાયટીમાં રહેતા મયુરસિંહ રાણા નામના 30 વર્ષના ગરાસિયા યુવાન સર્વેશ્ર્વર ચોકમાં હતા ત્યારે જૂના મન દુ:ખના કારણે જાણીતા લોકસાહિત્યકાર દેવાયત ખવડે હુમલો કરતા ઘવાયેલા મયુરસિંહ રાણાને સારવાર માટે હોસ્પિટલમાં દાખલ કરાયા છે. મુળ કોંઢ ગામના વતની મયુરસિંહ રાણા એકાદ વર્ષ પહેલા રવિરત્ન પાર્કમાં કાર પાર્કિંગના પ્રશ્ને પટેલ શખ્સ સાથે ઝઘડો થયો હતો ત્યારે પટેલ શખ્સનું ઉપરાણું લઈ દેવાયત ખવડ પાઈપ સાથે હુમલો કરવા ધસી આવ્યા હતા. પરંતુ બન્ને વચ્ચે ઉગ્ર ઝઘડો થતાં અટક્યો હતો.
છેલ્લા એકાદ વર્ષથી બન્ને વચ્ચે ચાલતી અદાવતના કારણે દેવાયત ખવડે હુમલો કર્યો હોવાનું પોલીસની પ્રાથમિક તપાસમાં બહાર આવ્યું છે. મયુરસિંહ રાણા પર હુમલો થયાની જાણ સગા-સંબંધીઓમાં થતાં તેઓ હોસ્પિટલ ખાતે દોડી આવ્યા છે.
