બિષ્ણુપુર જિલ્લાના નરસેના ખાતે સ્થિત ઈન્ડિયા રિઝર્વ બટાલિયન ઉપર 500 લોકોના ટોળાએ હલ્લાબોલ કર્યો, 298 રાઇફલ, 16000 ગોળીઓ, ગ્રેનેડ સહિતના અનેક ઘાતક હથિયારો લઈ ગયા
મણિપુરમાં હિંસા અટકવાનું નામ લઈ રહી નથી. હાલ રાજ્યમાં ગૃહયુદ્ધ જેવી ગંભીર કટોકટી ચાલી રહી છે. બિષ્ણુપુર જિલ્લાના નરસેના ખાતે સ્થિત ઈન્ડિયા રિઝર્વ બટાલિયન ’આઇઆરબી’ 2 ના મુખ્યાલયમાંથી લગભગ 500 લોકોના ટોળાએ 400 થી વધુ ઘાતક હથિયારોની લૂંટ કરી હતી. કુલ 45 વાહનોમાં સવાર અને પગપાળા આવેલા બદમાશોની સંખ્યા 500 હતી. લૂંટને અંજામ આપવામાં માત્ર 30 મિનિટનો સમય લાગ્યો હતો. બદમાશોએ 16000 થી વધુ ગોળીઓ પણ લૂંટી હતી. આ ઉપરાંત લૂંટારુઓ ઘાતક હથિયારોની મોટી સંખ્યામાં મેગેઝીન લૂંટી ગયા હતા.
પોલીસના જણાવ્યા અનુસાર આ ઘટના 3 ઓગસ્ટને સવારે સાડા દસ વાગે બની હતી. બદમાશોને કાબૂમાં લેવા માટે સુરક્ષા દળોએ 327 રાઉન્ડ ફાયરિંગ કર્યું હતું. ટીયરગેસના 20 શેલ છોડવામાં આવ્યા, પરંતુ બદમાશોનો રસ્તો રોકી શકાયો નહીં. સવાલ એ ઊભો થાય છે કે મણિપુરના મોટાભાગના વિસ્તારોમાં આર્મી, આસામ રાઈફલ્સ, અર્ધલશ્કરી દળો અને સ્થાનિક પોલીસ તૈનાત હોવા છતાં, બદમાશો સરળતાથી હથિયારો લૂંટી લે છે.
મણિપુરમાં 3 મેથી ચાલી રહેલી હિંસા હજુ કાબૂમાં આવી નથી. 7 મે પહેલા થયેલી હિંસામાં લગભગ 4600 હથિયારો લૂંટાયા હતા. તેમાં એકે 47, એલએમજી, ઇન્સાસ અને કાર્બાઇન જેવા ઘાતક હથિયારોનો પણ સમાવેશ થાય છે. કેન્દ્રીય ગૃહ પ્રધાન અમિત શાહે મણિપુરની તેમની ત્રણ દિવસીય મુલાકાત દરમિયાન બદમાશોને કોઈપણ વિલંબ કર્યા વિના લૂંટેલા હથિયારો જમા કરાવવા અપીલ કરી હતી. આ પછી સર્ચ કરવામાં આવશે અને જે લોકો હથિયારો સાથે મળી આવશે તેમની સામે કડક કાર્યવાહી કરવામાં આવશે. અત્યાર સુધીમાં માત્ર 1200 જેટલા હથિયારો પરત આવ્યા છે. મણિપુરમાં ત્રણ ડઝન જગ્યાએથી હથિયારો લૂંટાયા હતા.
ગુરુવારે નરસેના ખાતે ઈન્ડિયા રિઝર્વ બટાલિયન ’આઇઆરબી’ 2 ના હેડક્વાર્ટરમાંથી લૂંટાયેલા હથિયારોમાં સ્વચાલિત શસ્ત્રોનો સમાવેશ થાય છે. હથિયારોની સાથે મોટી સંખ્યામાં મેગેઝીન અને દારૂગોળો પણ લૂંટવામાં આવ્યો છે. આ લૂંટ જે રીતે થઈ છે તે અનેક સવાલો ઉભા કરે છે. બદમાશોને ખબર હતી કે કોટ ’આમ્ર્સ હાઉસ’ ક્યાં છે. તેઓ સીધા ત્યાં જાય છે. પાંચસો બળવાખોરોમાંથી, ફક્ત 75 લોકોની ટીમ હથિયાર સુધી પહોંચે છે.
પોલીસનો દાવો છે કે બદમાશોને હટાવવા માટે 327 રાઉન્ડ ફાયર અને ટીયર ગેસના 20 શેલ છોડવામાં આવ્યા હતા. જો કે, તેઓ બદમાશોને હથિયારો સુધી પહોંચતા અને તેને વાહનોમાં લોડ કરતા રોકી શક્યા ન હતા. જે સમયે આ લુંટ થઈ રહી હતી તે સમયે અન્ય કોઈ ફોર્સ ઘટનાસ્થળે પહોંચી ન હતી કે કેમ તે પણ સવાલ ઉઠી રહ્યો છે.
ફરી હિંસા: મેઇતેઈ સમુદાયના ત્રણ લોકોની હત્યા, ઘરો સળગાવાયા
મણિપુરમાં ફરી એકવાર હિંસાની આગ ભભૂકી ઉઠી છે. શુક્રવારે રાત્રે બિષ્ણુપુર જિલ્લામાં મેઇતેઈ સમુદાયના ત્રણ લોકોની હત્યા કરવામાં આવી હતી. આ સિવાય બદમાશોએ ઘણા ઘરોને પણ આગ લગાવી દીધી હતી. બિષ્ણુપુર પોલીસે જણાવ્યું કે મેઇતેઈ સમુદાયના ત્રણ લોકોની હત્યા કરવામાં આવી છે. આ ઉપરાંત કુકી સમુદાયના લોકોના ઘરોને આગ ચાંપવામાં આવી છે. પોલીસ સૂત્રોનું કહેવું છે કે કેટલાક લોકો બફર ઝોનને ઓળંગીને મેઇતેઇ વિસ્તારોમાં આવ્યા હતા અને મેઇતેઇ વિસ્તારોમાં ફાયરિંગ કર્યું હતું.
કેન્દ્રીય દળોએ બિષ્ણુપુર જિલ્લાના કવાક્તા વિસ્તારથી બે કિમીથી આગળ બફર ઝોન બનાવ્યો છે. આ પહેલા ગુરુવારે સાંજે બિષ્ણુપુરમાં અનેક જગ્યાએ ગોળીબાર બાદ સ્થિતિ તંગ બની ગઈ હતી. બેકાબૂ ટોળાની સુરક્ષાકર્મીઓ સાથે ઘર્ષણ પણ થયું હતું. મણિપુર પોલીસે માહિતી આપી હતી કે સુરક્ષા દળોએ સાત ગેરકાયદે બંકરોનો નાશ કર્યો હતો
