- છત્તીસગઢના નારાયણપૂર અને દંતેવાડામાં સુરક્ષા દળોનું એકસાથે બે ઓપરેશન
છત્તીસગઢના નારાયણપુર જિલ્લાના બસ્તર વિભાગના બીજાપુરની સરહદે આવેલા જંગલોમાં ગુરુવારે બે અલગ-અલગ એન્કાઉન્ટરમાં સાત નક્સલવાદીઓ ઠાર મારવામાં આવ્યા છે. નારાયણપુર, દંતેવાડા, બસ્તરના ત્રણ જિલ્લાના દળોનો સમાવેશ કરીને એક મોટું સંયુક્ત ઓપરેશન શરૂ કરવામાં આવ્યું હતું.
દંતેવાડા એસપી ગૌરવ રાયે જણાવ્યું હતું કે, પ્લાટૂન નંબર 16, ઇન્દ્રાવતી એરિયા કમિટી અને મારહ વિભાગના કેડરની હાજરી વિશેના ચોક્કસ ઇનપુટ્સના આધારે જિલ્લા રિઝર્વ ગાર્ડ્સ, બસ્તર ફાઇટર્સ, સ્પેશિયલ ટાસ્ક ફોર્સની સંયુક્ત ટીમે નક્સલ વિરોધી ઓપરેશન પાર પાડ્યું હતું.
એસપી રાયે જણાવ્યું હતું કે સવારે 11 વાગ્યાની આસપાસ માઓવાદીઓ અને સુરક્ષા દળો વચ્ચે અથડામણ શરૂ થઈ હતી. એક સંયુક્ત આંતર-જિલ્લા ઓપરેશનમાં બે એન્કાઉન્ટરમાં નારાયણપુર દળો દ્વારા બે અને દંતેવાડા દળો દ્વારા પાંચ નક્સલીઓને ઠાર મારવામાં આવ્યા છે. એન્કાઉન્ટર સ્થળ પરથી સાત સ્વચાલિત હથિયારો પણ મળી આવ્યા હતા. દંતેવાડા દળોનું નેતૃત્વ ડીએસપી રાહુલ ઉઇકે અને આશિષ નેતામ કરી રહ્યા હતા.
નારાયણપુરના એસપી પ્રભાત કુમારે જણાવ્યું હતું કે ઓપરેશન હજુ પણ ચાલુ છે અને સાત નક્સલવાદીઓના મૃતદેહને જપ્ત કરાયેલા હથિયારો સાથે બેઝ પર લાવવામાં આવી રહ્યા છે. કુમારે કહ્યું કે વધુ વિગતો ટૂંક સમયમાં જાહેર કરવામાં આવશે કારણ કે તેઓ સુરક્ષા દળોના સંપર્કમાં છે જે હજુ પણ એન્કાઉન્ટરમાં છે.
આ એન્કાઉન્ટર સાથે રાજ્યમાં અલગ-અલગ એન્કાઉન્ટરમાં આ વર્ષે નક્સલવાદીઓના મોતનો આંકડો 112ને સ્પર્શી ગયો છે.
તાજેતરના મોટા એન્કાઉન્ટરમાં 10 મેના રોજ બીજાપુરના પીડિયા ગામમાં 12 નક્સલી માર્યા ગયા હતા. 30 એપ્રિલના રોજ નારાયણપુર અને કાંકેર જિલ્લાની સરહદો પર એન્કાઉન્ટરમાં 10 નક્સલવાદીઓ માર્યા ગયા હતા. 16 એપ્રિલના રોજ કાંકેરમાં 29 માર્યા ગયા હતા.