આંખ-કાનની હોસ્પિટલમાં સારવાર અર્થે આવેલા માતા-પુત્રીની સીધી લાશ મળી !!
સીસીટીવી ફુટેજ સહિતના પુરાવા કબજે કરી પોલીસે તપાસના ચક્રો ગતિમાન કર્યા
અમદાવાદ શહેરના કાગડાપીઠ વિસ્તારમાં આવેલી એક ખાનગી હોસ્પિટલમાંથી બે લાશ મળી આવી છે. પ્રાથમિક તપાસમાં બંને માતા-પુત્રી હોવાનું સામે આવ્યું છે. આ ઉપરાંત બંનેની હત્યા કરી હોવાનું જાણવા મળ્યું છે. હાલ પોલીસે આગળની તપાસ હાથ ધરી છે. મૃતકના પરિવારનું કહેવું છે કે, તેમને ખબર નથી કે તેઓ અહીંયા કેવી રીતે પહોંચી ગયા?
મણિનગરમાં ભુલાભાઈ પાર્ક વિસ્તારમાં હોસ્પિટલના ઓપરેશન થિયેટરમાં કબાટમાંથી માતા (ચંપાબેન) અને પુત્રી (ભારતીબેન વાળા)ની લાશ મળી આવતા ચકચાર મચી જવા પામી છે. મળતી માહિતી અનુસાર સૌથી પહેલા પરિણીતાની લાશ ઓપરેશન થિયેટરના કબાટમાંથી અને ત્યાર બાદ બેડ નીચેથી તેમના માતાની લાશ મળી હતી. હોસ્પિટલમાં માતા અને દીકરી સારવાર માટે આવ્યા હતા.
બનાવની જાણ થતાં પોલીસે ઘટનાસ્થળે પહોંચીને આગળની તપાસ હાથ ધરી છે.સૂત્રો પાસેથી પ્રાપ્ત માહિતી અનુસાર હોસ્પિટલની અંદર ખૂબ જ દુર્ગંધ મારતી હતી. જેથી તપાસ કરતા કબાટમાંથી એક પરિણીતા અને બેડ નીચેથી એક મહિલાની લાશ મળી હતી. બનાવને પગલે તાત્કાલિક પોલીસને જાણ કરાતા ઉચ્ચ અધિકારીઓ સહિતનો કાફલો દોડી આવ્યો હતો અને લાશને કબજે કરીને આગળની તપાસ હાથ ધરી હતી. આ કેસમાં એકની અટકાયત કર્યાનું પણ જાણવા મળ્યું છે.
સમગ્ર મામલે પોલીસનું કહેવું છે કે, બંને હોસ્પિટલમાં કયા કારણોસર આવી હતી અને બંનેનું મોત કેવી રીતે થયું અને કોની સંડોવણી છે તેને લઈને સમગ્ર મામલે તપાસ ચાલી રહી છે. બીજી તરફ માતા અને દીકરી હોસ્પિટલમાં આવતા હોય તેવા સીસીટીવી ફૂટેજ પણ સામે આવ્યા છે. જેના આધારે પણ પોલીસ દ્વારા તપાસ કરવામાં આવી રહી હોવાનું સામે આવ્યું છે. બીજી તરફ એવી પણ શંકા વ્યક્ત કરવામાં આવી રહી છે કે, દવા અથવા એનેસ્થેસિયાના ઓવરડોઝના કારણે મોત થયું હોઈ શકે છે.
સાથે જ એવી પણ ચર્ચાઓ છે કે, પરિણીતાની હત્યા કરવામાં આવી હોઈ શકે છે. હાલ હોસ્પિટલમાં એકસાથે બે લાશ મળી આવતા અનેક સવાલો ઉભા થયા છે. જેના જવાબ પોલીસ તપાસ બાદ જ સામે આવી શકે છે. બનાવની જાણ થતાં પરિવારજનો પણ દોડી આવ્યા હતા. પરિવારના સભ્યનું કહેવું છે કે, તેમના માતા અને બહેન એલજી હોસ્પિટલ માટે સવારે નીકળ્યા હતા. પરંતુ અહીંયા કેવી રીતે આવી તે ખબર નથી પડી રહી.
