2024ની ચૂંટણી માટે કોંગ્રેસ સોશિયલ મીડિયા માર્કેટિંગને સઘન બનાવશે

વોટ્સએપ ગ્રુપની સાથે એક એપ્લિકેશન બનાવવાનું રાહુલ ગાંધીનું આયોજન

અબતક, નવી દિલ્હી : વર્ષ 2024ની ચૂંટણીમાં યુવા મતદારોને આકર્ષવા માટે કોંગ્રેસ સોશિયલ મીડિયા માર્કેટિંગને સઘન બનાવવાનું છે. જેમાં વોટ્સએપ ગ્રુપની સાથે એક એપ્લિકેશન બનાવવાનું પણ આયોજન રાહુલ ગાંધીએ કહ્યું હોવાનું જાણવા મળી રહ્યું છે.

ડિજિટલ-સોશિયલ મીડિયાના નેટવર્કને વિસ્તૃત કરવાની કોંગ્રેસે યોજના બનાવી છે. કોંગ્રેસ 2024ની ચૂંટણી સંદર્ભે રાજકીય પ્રચાર અને મતદારોને એકત્રિત કરવા માટે વિધાનસભા મતવિસ્તાર સ્તર સુધી વોટ્સએપ ગ્રુપ વેબનો સહારો લેશે. આ ઉપરાંત  રાહુલ કનેક્ટની થીમ સાથે, કોંગ્રેસ રાષ્ટ્રીય સ્તરે રાજ્યોમાં ઓનલાઈન કેડર કનેક્ટિવિટી માટે એક એપ્લિકેશન પર પણ વિચાર કરી રહી છે.  લાંબા સમય સુધી કોવિડ-19 રોગચાળા દરમિયાન સામનો કરવો પડેલી આવશ્યકતાઓના આધારે આગામી સંસદીય ચૂંટણીઓ માટે તેની સોશિયલ મીડિયા-ઓનલાઈન તાકાતને ધરમૂળથી પરિવર્તિત કરવાનો કોંગ્રેસ વિચાર કરી રહી છે.

સૂત્રોના જણાવ્યા અનુસાર, વોટ્સએપ ગ્રુપ – “ આરજી કનેક્ટ 2024” શરૂ કરવામાં આવશે અને સભ્યોને વિતરિત પ્રમોશનલ સામગ્રી અને રાજકીય સંદેશાઓ તેમના વ્યક્તિગત સોશિયલ મીડિયા પ્લેટફોર્મ પર પોસ્ટ કરીને અને અન્ય નાગરિકો સુધી પહોંચાડવા માટે કહેવામાં આવશે. જ્યારે શરૂઆતમાં રાજ્યોમાં ઘણા મોટા ક્લસ્ટરો બનાવવાની યોજના છે, તે પછી તેને ઝોનલ સ્તરે અથવા વિધાનસભા મતવિસ્તારના સ્તરે પેટા-વિભાજિત કરવામાં આવશે.  કેટલાક રાજ્યોમાં, આને બૂથ સ્તર સુધી પણ લઈ જઈ શકાય છે.

સૂત્રોએ જણાવ્યું હતું કે સક્રિય સભ્યોને આ વોટ્સએપ જૂથોનો ભાગ બનાવવામાં આવશે, જેઓ પ્રોજેક્ટ માટે ઘડવામાં આવેલી વ્યૂહરચના દ્વારા પાર્ટીના સભ્યો અને સામાન્ય મતદારો સાથે નેટવર્ક કરશે. કોંગ્રેસ “રાહુલ કનેક્ટ” થીમ સાથે સોશિયલ મીડિયા કેમ્પેઈન પર જે મહત્વાકાંક્ષી પ્રોજેક્ટ ચલાવી રહી છે તેને ધ્યાનમાં લેતા, આ એક સંકેત તરીકે જોઈ શકાય છે કે હવે કોંગ્રેસે સોશિયલ મીડિયા માર્કેટિંગ ઉપર વધુ પડતું ફોકસ કર્યું છે.