દિલ્હી ઉપરાંત ઉત્તર પ્રદેશ, પંજાબ, હરિયાણા, તેલંગાણા અને મહારાષ્ટ્રના 30થી વધુ સ્થળો ઉપર ઇડીના દરોડા
દિલ્હીમાં દારૂના કથિત કૌભાંડને લઈને ચાલી રહેલી સીબીઆઈ તપાસની વચ્ચે ઈડી પણ આવી ગઈ છે. દિલ્હી-એનસીઆર સહિત દેશના ઘણા રાજ્યોમાં 30 થી વધુ સ્થળો પર દરોડા પાડવામાં આવ્યા છે. દિલ્હી ઉપરાંત ઉત્તર પ્રદેશ, પંજાબ, હરિયાણા, તેલંગાણા અને મહારાષ્ટ્રમાં ઇડીના દરોડા પડ્યા છે.
દિલ્હીમાં રાજ્ય સરકારની દારૂ નીતિ પર મુખ્યમંત્રી અરવિંદ કેજરીવાલની સમસ્યાઓ સતત વધી રહી છે. આપની દારૂ નીતિના અમલમાં કૌભાંડ આચરાયું હોવાનો આક્ષેપ કરતાં સીબીઆઈએ નાયબ મુખ્યમંત્રી મનીષ સિસોદિયાના ઘરે, ઓફિસે દરોડા પાડયા પછી હવે ઈડી પણ સક્રિય થઈ છે. ઈડીએ મંગળવારે દિલ્હી, ઉત્તર પ્રદેશમાં દારૂના વેપારીઓના 35થી વધુ સ્થળો પર દરોડા પાડયા હતા. આ સિવાય ઈડીએ મની લોન્ડરિંગનો કેસ પણ દાખલ કર્યો છે.
એન્ફોર્સમેન્ટ ડિરેક્ટોરેટે દિલ્હીની દારૂ નીતિના કૌભાંડના સંદર્ભમાં દિલ્હી, મુંબઈ, ગુરુગ્રામ, બેંગ્લુરુ અને હૈદરાબાદ સહિત 7 અલગ અલગ શહેરોમાં દારૂના વેપારીઓના સ્થળો પર દરોડા પાડયા છે. તપાસ એજન્સીઓના નિશાના પર હવે દારૂના વેપારીઓ છે.
આ સાથે ઈડીએ એક્સાઈઝ વિભાગના કેટલાક ભૂતપૂર્વ અધિકારીઓના ઘરે પણ દરોડા પાડયા હતા. ઈડીએ એવા લોકોના ઘરો પર દરોડા પાડયા છે, જેમના નામ સીબીઆઈની એફઆઈઆરમાં નોંધાયેલા છે. જોકે, આ એફઆઈઆરમાં મનીષ સિસોદિયાનું નામ છે.
તપાસ એજન્સીએ મેસર્સ ઈન્ડો સ્પ્રિટ્સના એમડી સમીર મહેન્દ્રુના સ્થળો પર પણ દરોડા પાડયા છે. તેઓ દિલ્હીના જોર બાગ વિસ્તારમાં રહે છે. તેમના પર એક કરોડ રૂપિયા મેસર્સ રાધા ઈન્ડસ્ટ્રીઝના રાજેન્દ્ર પ્લેસ સ્થિત યુકો બેન્કના ખાતામાં ટ્રાન્સફર કરવાનો આરોપ છે. મહેન્દ્રુના ઘરે ઈડી સવારે 7.00 વાગ્યે પહોંચી હતી તેમ સૂત્રોએ જણાવ્યું હતું.
ઈડીના દરોડા વચ્ચે દિલ્હીના નાયબ મુખ્યમંત્રી મનીષ સિસોદિયાએ કહ્યું કે, પહેલા તેમણે સીબીઆઈના દરોડા પાડયા. કશું જ મળ્યું નહીં. હવે ઈડી દરોડા પાડયા છે. તેમાં પણ કશું નહીં મળે. દેશમાં શિક્ષણના કથળેલા વાતાવરણને સુધારવા અરવિંદ કેજરીવાલ જે કામ કરી રહ્યા છે, તેમને રોકવા માટે આ દરોડા પાડવામાં આવી રહ્યા છે, પરંતુ તેઓ અમને રોકી શકશે નહીં. અમે પ્રમાણિક્તાથી કામ કર્યું છે.
નવી દારૂ નીતિ બાદ વેપારીઓ મોટા ડિસ્કાઉન્ટ ઉપર દારૂનું વેચાણ કરતા હોવાનો આરોપ
હકીકતમાં દિલ્હીમાં કેજરીવાલ સરકાર નવી દારૂ નીતિ લઈને આવી હતી. આ નીતિના અમલ પછી દિલ્હીના દારૂના વેપારીઓ ગ્રાહકોને ડિસ્કાઉન્ટ રેટ પર દારૂ વેચી રહ્યા હતા. અનેક જગ્યાઓ પર એક બોટલ ખરીદવા પર બીજી મફત અપાઈ રહી હતી. દિલ્હી સરકારની એક્સાઈઝ નીતિ 2021-22ના કારણે એક સમય એવો પણ આવ્યો હતો જ્યારે દિલ્હીમાં દારૂની દુકાનોની સંખ્યા અંદાજે 650 પર પહોંચી ગઈ હતી. તપાસ એજન્સીએ નવી દારૂ નીતિમાં કૌભાંડ હોવાનો દાવો કર્યા પછી ઉપરાજ્યપાલ વીકે સક્સેનાએ સીબીઆઈ તપાસની ભલામણ કરી હતી.
પંજાબના આબકારી અને સંયુક્ત કમિશનરના આવાસ ઉપર પણ દરોડા
એન્ફોર્સમેન્ટ ડિરેક્ટોરેટના અધિકારીઓની એક ટીમે પંજાબના આબકારી કમિશનર અને સંયુક્ત કમિશનરના આવાસ પર દરોડા પાડ્યા હતા. જો કે, સૂત્રોએ જણાવ્યું હતું કે આ દરોડા કયા કેસોમાં કરવામાં આવ્યા હતા તે હજુ સુધી જાણી શકાયું નથી. ઇડીએ પંજાબના સેક્ટર-20માં ભારતીય વહીવટી સેવા અધિકારી અને આબકારી કમિશનર વરુણ રૂજમ અને પંચકુલામાં સંયુક્ત કમિશનર નરેશ દુબેના નિવાસસ્થાને દરોડા પાડ્યા હતા. રૂજમ અને દુબે બંનેએ પંજાબની આબકારી નીતિ ઘડવાનું કામ કર્યું હતું. આ નીતિ જુલાઈથી લાગુ કરવામાં આવી હતી.
એનએસઇના ભૂતપૂર્વ સીઇઓ રવિ નારાયણની ઇડીએ કરી ધરપકડ
એન્ફોર્સમેન્ટ ડિરેક્ટોરેટ એ મંગળવારે મની લોન્ડરિંગ કેસમાં નેશનલ સ્ટોક એક્સચેન્જના ભૂતપૂર્વ મેનેજિંગ ડિરેક્ટર અને ચીફ એક્ઝિક્યુટિવ ઓફિસર રવિ નારાયણની ધરપકડ કરી હતી. ફેડરલ તપાસ એજન્સી કો લોકેશન કૌભાંડ અને કર્મચારીઓના ફોન ગેરકાયદેસર ટેપિંગના આરોપો સંબંધિત બે ફોજદારી કેસોમાં નારાયણની ભૂમિકાની તપાસ કરી રહી છે. એવું માનવામાં આવે છે કે રવિ નારાયણની ફોન ટેપ કરવા બદલ પ્રિવેન્શન ઓફ મની લોન્ડરિંગ એક્ટની ફોજદારી કલમો હેઠળ ધરપકડ કરવામાં આવી હતી.
નિર્ણાયક તબક્કાના કેસોની તપાસ સારી રીતે થઈ શકે એટલે ઇડીના વડાનો કાર્યકાળ લંબાવાયો: કેન્દ્ર
કેન્દ્ર સરકારે સોમવારે એન્ફોર્સમેન્ટ ડિરેક્ટોરેટ ના વડાના કાર્યકાળને પાંચ વર્ષ સુધી લંબાવવાની મંજૂરી આપવાના સુધારેલા કાયદા સામે રાજકારણીઓ દ્વારા દાખલ કરવામાં આવેલી પીઆઈએલ પર સવાલ ઉઠાવ્યા હતા અને તેને દબાણ લાવવાનું રાજકારણ ગણાવ્યું હતું. સુપ્રીમ કોર્ટે આવી આઠ પીઆઈએલના નિકાલ માટે 19 સપ્ટેમ્બરની તારીખ નક્કી કરી છે. જેમાં રણદીપ સિંહ સુરજેવાલા અને મહુઆ મોઇત્રા દ્વારા દાખલ કરાયેલી અરજીઓનો સમાવેશ થાય છે. આ સાથે સુપ્રીમ કોર્ટ દ્વારા વરિષ્ઠ વકીલ કે.કે. વી. વિશ્વનાથનને એમિકસ ક્યુરી તરીકે પણ નિયુક્ત કરવામાં આવ્યા હતા. મુખ્ય ન્યાયાધીશ ઉદય ઉમેશ લલિત અને ન્યાયમૂર્તિ એસ રવિન્દ્ર ભટ્ટની બેન્ચે કેન્દ્ર તરફથી
હાજર રહેલા સોલિસિટર જનરલ તુષાર મહેતાની રજૂઆતની નોંધ લીધી હતી કે સરકારનો જવાબ તૈયાર છે અને દાખલ કરવામાં આવશે. સરકારના કાયદા અધિકારીએ કહ્યું, “મારે એક ચોક્કસ મુદ્દો ઉઠાવવો છે… એક કે બે સિવાય, તમામ અરજીઓ એવા પક્ષોના નેતાઓ દ્વારા દાખલ કરવામાં આવી છે કે જેમના નામાંકિત નેતાઓની એજન્સી દ્વારા તપાસ કરવામાં આવી રહી છે, અને આ પીઆઇએલ નથી. દબાણ લાવવાની પૂર્વઆયોજીત યોજના છે. વધુમાં કેન્દ્રીય નાણા મંત્રાલયે સર્વોચ્ચ અદાલતને જણાવ્યું છે કે અમલીકરણ નિદેશાલયના વડાનો કાર્યકાળ જાહેર હિતમાં બે વર્ષથી વધારીને પાંચ વર્ષ કરવામાં આવ્યો છે જેથી કરીને નિર્ણાયક તબક્કામાં હોય તેવા અનેક સંવેદનશીલ કેસોની તપાસની દેખરેખ અને દેખરેખમાં સાતત્ય સુનિશ્ચિત કરી શકાય.
