પાટણવાવ ગામે આખલાએ પરિવારના મોભીનો ભોગ લીધો

આખલાએ ઢીક મારતા અકસ્માતમાં ઘવાયેલા આધેડે સારવારમાં દમ તોડયો

ધોરાજી તાલુકાના પાટણવાવ ગામે રહેતા અને મજૂરી કામ કરતા આધેડને આખલાએ અડફેટે લેતાં ગંભીર રીતે ઘવાયેલાં બાઈક ચાલકે લાંબી સારવાર બાદ દમ તોડતા પરિવારમાં શોકનો માહોલ છવાયો છે.આ અંગેની પોલીસમાંથી પ્રાપ્ત વિગત મુજબ પાટણવાવ ગામે રહેતા અનિલભાઈ કાંતિભાઈ પેથાણી નામના 47 વર્ષીય આધેડ ગત તા.29મી નવેમ્બરના રોજ પોતાનું બાઈક લઈને જતા હતા ત્યારે પાટણવાવ અને કાથરોટા વચ્ચે આખલાએ ઠોકર મારતા અકસ્માત સર્જાયો હતો.

આ અકસ્માતમાં ગંભીર રીતે ઘવાયેલાં અનિલભાઈ પેથાણીને સારવાર માટે ઉપલેટા બાદ વધુ સારવાર માટે જૂનાગઢ અને ત્યાંથી રાજકોટ રિફર કરવામાં આવ્યા હતા. જ્યાં આધેડે લાંબી સારવાર બાદ સારવારમાં દમ તોડતા પરિવારમાં આક્રંદ છવાયો છે.