શું વોટ્સઅપ માઈક ચાલુ રાખી વ્યક્તિગત સ્વતંત્રતાને છીનવી રહ્યું છે?

ભારતમાં સંદેશા વ્યવહાર માટે વોટ્સઅપનો સૌથી વધુ ઉપયોગ : આઈટી મંત્રાલયે તપાસના આદેશ આપ્યા

સોશિયલ મીડિયાની ઉપયોગ જયારે ખુબ ઝડપે વધી રહ્યો છે ત્યારે એક ચોંકાવનારા સમાચાર પ્રાપ્ત થઇ રહ્યા છે. ભારતમાં સંદેશા વ્યવહાર માટે સૌથી વધુ ઉપયોગમાં લેવાતા વોટ્સઅપ લોકોની ખાનગી વાતો સાંભળી રહ્યું હોય તેવી ફરિયાદ ઉઠી છે. મોબાઈલ ફોન જયારે ઉપયોગમાં ન હોય ત્યારે વોટ્સઅપ માઈક્રોફોન ચાલુ રાખી લોકોની વ્યક્તિગત સ્વતંત્રતા છીનવી રહ્યું હોય તેવા અહેવાલ સામે આવતા વપરાશકર્તાઓની સાથે કેન્દ્રીય આઈટી મંત્રાલય પણ હરકતમાં આવી ગયું છે.

ઈન્ફોર્મેશન ટેક્નોલોજી રાજ્ય મંત્રી રાજીવ ચંદ્રશેખરે બુધવારે જણાવ્યું હતું કે, જ્યારે ફોન ઉપયોગમાં ન હતો ત્યારે વોટ્સઅપ સ્માર્ટફોન યુઝર્સના માઈક્રોફોનને એક્સેસ કર્યા હોવાના દાવાઓની સરકાર તપાસ કરશે.

એક ટ્વિટમાં મંત્રીએ કહ્યું કે સરકાર કથિત ગોપનીયતા ઉલ્લંઘનની તપાસ કરશે. જ્યારે એક નવું ડિજિટલ પર્સનલ ડેટા પ્રોટેક્શન બિલ તૈયાર કરવામાં આવી રહ્યું છે.  ત્યારે એવો દાવો કરવામાં આવ્યો હતો કે વોટ્સએપે એક યુઝરના માઇક્રોફોનને એક્સેસ કર્યો હતો જ્યારે તે સૂતો હતો.

ટ્વિટરના એન્જિનિયરિંગ ડિરેક્ટર ફોદ ડાબિરીએ શનિવારે જણાવ્યું હતું કે, જ્યારે હું સૂતો હતો અને સવારે 6 વાગ્યે જાગી ગયો ત્યારે વૉટ્સએપ પૃષ્ઠભૂમિમાં માઇક્રોફોનનો ઉપયોગ કરી રહ્યું હતું. ડાબીરીના ટ્વીટનો જવાબ આપતા ચંદ્રશેખરે કહ્યું કે તે અસ્વીકાર્ય છે અને ગોપનીયતાનું ઉલ્લંઘન છે. તેમણે કહ્યું કે નવું ડિજિટલ પર્સનલ ડેટા પ્રોટેક્શન બિલ તૈયાર કરવામાં આવી રહ્યું હોવા છતાં અમે તરત જ તેની તપાસ કરીશું અને ગોપનીયતાના કોઈપણ ઉલ્લંઘન પર પગલાં લઈશું.

ડાબીરીનું ટ્વીટ વાઈરલ થયું જેણે 65 મિલિયનથી વધુ વ્યૂ મેળવ્યા. વોટ્સએપે જવાબ આપ્યો કે તે છેલ્લા 24 કલાકથી ટ્વિટર એન્જિનિયરના સંપર્કમાં છે, જેણે તેના પિક્સેલ ફોન અને વોટ્સએપ સાથે સમસ્યા પોસ્ટ કરી છે.

વ્હોટ્સએપે એક ટ્વિટમાં કહ્યું કે અમે માનીએ છીએ કે આ એન્ડ્રોઇડ પર એક બગ છે જે તેમના પ્રાઇવસી ડેશબોર્ડમાં માહિતીને ખોટી રીતે રજૂ કરે છે અને તેણે ગૂગલને તપાસ કરવા અને તેને ઠીક કરવા કહ્યું છે.  કંપનીએ એવો પણ દાવો કર્યો છે કે યુઝર્સને તેમના માઈક સેટિંગ્સ પર સંપૂર્ણ નિયંત્રણ છે.

કંપનીએ એ પણ જણાવ્યું કે પરવાનગી મળ્યા બાદ જ વોટ્સઅપ માઈકને એક્સેસ કરી શકશે.  જ્યારે કોઈ વપરાશકર્તા કૉલ કરી રહ્યો હોય અથવા વૉઇસ નોટ અથવા વિડિયો રેકોર્ડ કરી રહ્યો હોય, ત્યારે પણ આ સંચાર એન્ડ-ટુ-એન્ડ એન્ક્રિપ્શન દ્વારા સુરક્ષિત છે, તેથી વોટ્સઅપ તેમને સાંભળી શકતું નથી.

ટ્વિટર સાથે કામ કરતા એન્જિનિયરે તેના ફોનના સ્ક્રીનશૉટ્સ શેર કર્યા હતા, જેમાં તે ઊંઘી રહ્યો હતો ત્યારે તેના હેન્ડસેટના માઇક્રોફોનનો ઉપયોગ વોટ્સએપને ઘણી વખત કરતો દેખાતો હતો. સ્ક્રીનશૉટએ ટ્વિટર અને ટેસ્લા ઇન્કના વડા એલોન મસ્ક સહિત ઘણા વપરાશકર્તાઓને ચિંતા વ્યક્ત કરવા માટે પ્રોત્સાહિત કર્યા.