રાજકોટના પોલીસ કમિશનર ગહેલૌતની વડોદરા બદલી: મનોજ અગ્રવાલની કમિશનર તરીકે નિમણુંક

રાજકોટના રેન્જ આઈજી ડી.એન.પટેલને સુરત જોઇન્ટ પોલીસ કમિશનર, રાજકોટ શહેર જેસીપી ડી.એસ.ભટ્ટને એસીબીમાં બદલી: રાજકોટ રેન્જમાં સંદિપસિંધ અને જેસીપી તરીકે એસ.એમ.ખત્રીની નિમણુંક

રાજય સરકારે અમદાવાદ રથયાત્રા બાદ તુરંત ૩૧ સિનિયર આઇપીએસ અધિકારીઓની બદલીના ઓર્ડર કરવામાં આવ્યા છે. રાજકોટના પોલીસ કમિશનર અનુપમસિંહ ગહેલૌતને વડોદરા શહેરના પોલીસ કમિશનર તરીકે, અને ગૃહ વિભાગના અગ્રસચિવ મનોજ અગ્રવાલને રાજકોટના પોલીસ કમિશનર તરીકે નિમણુંક કરવામાં આવી છે.

રાજકોટ રેન્જના આઇજીપી ડી.એન.પટેલને સુરત શહેર જોઇન્ટ પોલીસ કમિશનર અને ભ‚ચના એસ.પી. સંદિપસિંઘને રાજકોટ રેન્જના ડે.આઇજીપી તરીકે બદલી કરવામાં આવી છે. આ ઉપરાંત રાજકોટ શહેરના જોઇન્ટ પોલીસ કમિશનર ડી.એસ.ભટ્ટને અમદાવાદ એસીબીમાં સ્પેશ્યલ ડાયરેકટર તરીકે અને તેમની જગ્યાએ કોસ્ટલ સિક્યુરીટી આઇબીમાં ફરજ બજાવતા એસ.એમ.ખત્રીની નિમણુંક કરવામાં આવી છે.

મુખ્ય મંત્રી વિજયભાઇ રૂપાણીના હોમ ટાઉનમાં છેલ્લા અઢી વર્ષથી પોલીસ કમિશનર તરીકે ફરજ બજાવતા અનુપમસિંહ ગહેલૌતે સ્ટોન ક્લિર હિતેશ રામાવત, આંગડીયા લૂંટ, અનડીટેકટ ખૂન, ઘરફોડ ચોરી સહિતના અનેક વણશોધાયેલા ગુનાનો ભેદ ઉકેલવામાં સારી સફળતા મેળવતા રાજકોટવાસીઓમાં સારી લોક ચાહના મેળવી હતી.

રાજકોટમાં પોલીસ કમિશનર અનુપમસિંહ ગહેલૌતના કાર્યકાળ દરમિયાન યુનિવર્સિટી, કુવાડવા રોડ અને બી ડિવિઝન પોલીસ મથકના નવા બિલ્ડીંગ બન્યા છે. અને સાઇબર ક્રાઇમના ગુનાનો ભેદ ઉકેલવા માટે રાજકોટ માટે સાઇબર પોલીસ સ્ટેશનની મંજુરી મળી છે.

લાતી પ્લોટના વેપારીઓને લુખ્ખા ઇભલા દ્વારા વેપારીઓ પાસેથી ખંડણી પડાવવાની રંજાડ હોવાથી પોલીસ કમિશનર અનુપમસિંહ ગહેલૌતે કુવાડવા રોડ પર વેપારીઓ સાથે લોક દરબાર યોજી લાતી પ્લોટ વિસ્તારમાં કાયમી ધોરણે પોલીસ ચોકી મંજુર કરી હતી તેમજ ખંડણીખોર ઇભલાની ધરપકડ કરી જાહેરમાં સરભરા કરી કાયદાનું ભાન કરાવ્યું હતું.

વ્યાજખોરો સામે કડક કાર્યવાહી માટે લોક દરબાર યોજી વ્યાજના વિષચક્રમાં ફસાયેલા સામાન્ય અને ગરીબ વર્ગને ભય મુક્ત કરાવ્યા છે. જયારે રાજકોટ રેન્જ આઇજીપી ડી.એન.પટેલે રાજકોટ જિલ્લા, જામનગર, સુરેન્દ્રનગર, જામનગર અને દેવભૂમિ દ્વારકામાંથી કરોડો ‚પિયાની કિંમતનો વિદેશી દારૂ ઝડપી લેવામાં સફળતા મળી છે. તેમજ મીઠાપુર ખાતે ડ્રગ્સની ફેકટરી ઝડપી લેવામાં મોટી સફળતા મળી છે.

બદલી થયેલા ૩૧ સિનિયર આઈ.પી.એસ.અધિકારીઓ

રાજકોટ: રથયાત્રા પૂર્ણ થતાં સરકારે ૩૧ સિનિયર આઈપીએસ અધિકારીઓની મોડીરાત્રે બદલીના હુકમ જાહેર કર્યા હતા. ગૃહ વિભાગનાં પ્રિન્સીપાલ સેક્રેટરી મનોજ અગ્રવાલને રાજકોટ પોલીસ કમિશનર અને રાજકોટના પોલીસ કમિશનર અનુપમસિંહ ગેહલોતને વડોદરા પોલીસ કમિશનર તરીકે નિમણુક આપવામાં આવી છે.