ICC દ્વારા આગામી ટી-20 વર્લ્ડ કપનો કાર્યક્રમ જાહેર કરાયો

24મી ઓક્ટોબરે ભારત-પાકિસ્તાન વચ્ચે હાઇવોલ્ટેજ મેચ: કુલ 45 મેચ રમાશે: 12ના ગ્રુપમાં મુકાબલો યોજાશે: 14મી નવેમ્બરે ફાઇનલ

આઇસીસી દ્વારા આગામી વર્લ્ડ કપ ટી-20નો કાર્યક્રમ જાહેર કરવામાં આવ્યો છે. જેમાં પાંચ વર્ષ પછી ભારત અને પાકિસ્તાન વચ્ચે હાઇવોલ્ટેજ મેચ રમાવા જઈ રહ્યો છે. 17મી ઓક્ટોબરથી શરૂ થતાં ટી-20 વર્લ્ડ કંપની ફાઇનલ મેચ 14મી નવેમ્બરના યોજાશે.

ઇન્ટરનેશનલ ક્રિકેટ કાઉન્સિલે આ વર્ષે રમાનારા ટી-20 વર્લ્ડકપના કાર્યક્ર્મની જાહેરાત કરી છે. 2007ની ટી-20 ચેમ્પિયન ભારતીય ટીમ વર્લ્ડ કપમાં અભિયાનની શરૂઆત જ કટ્ટર હરીફ પાકિસ્તાન સામે 24મી ઓક્ટોબરથી કરશે. બીજી બાજુ, ટુર્નામેન્ટની પ્રથમ મેચ 17 ઓક્ટોબરે ઓમાન અને પાપુઆ ન્યૂ ગિની વચ્ચે રમાશે. ફાઇનલ મેચ 14મી નવેમ્બરે રમાશે.

જેના માટે આઈસીસીએ થોડા સમય પહેલા ટી-20 વર્લ્ડ કપ માટે ગ્રુપની જાહેરાત કરી હતી. ઓમાનમાં રમાનારા રાઉન્ડમાં 8 ટીમો સુપર-12 માં સ્થાન મેળવવા માટે રમશે. આ ટીમોમાં 2014ની ટી-20 વિજેતા શ્રીલંકા ઉપરાંત આયર્લેન્ડ અને બાંગ્લાદેશ જેવી મોટી ટીમોના નામ પણ સામેલ છે.

વર્લ્ડ કપનું આયોજન 17 ઓક્ટોબરથી 14 નવેમ્બર સુધી યોજાશે. ક્વોલિફાઇંગ રાઉન્ડ સહિત કુલ 45 મેચ રમાશે. તેમાંથી ક્વોલિફાયર રાઉન્ડમાં 12 મેચ અને સુપર-12 રાઉન્ડમાં 30 મેચ રમાશે. આ સિવાય સેમીફાઇનલ અને ફાઇનલ મેચ પણ થશે. ભારત અને પાકિસ્તાન અત્યાર સુધી 4 વખત આમને-સામને રમી ચૂકી છે જેમાં અત્યાર સુધી ભારતનુ પલડુ ભારે રહ્યું છે ત્યારે ર4મી ઓક્ટોબરના ફરી એકવાર બંને વચ્ચે હાઇવોલ્ટેજ મુકાબલો જોવા મળશે.