દેશના હજારો લોકોએ ચંદ્ર ઉપર પ્લોટ ખરીદ્યા, ચંદ્ર જાણે પોતાની માલિકીનો હોય તેમ અમેરિકાની બે એજન્સીએ પ્લોટનું વેચાણ કરી વિશ્વભરમાંથી અબજો રૂપિયા ઉસેડયા
આવડત હોય તો માણસ પથ્થર વેચીને પણ પૈસા કમાઈ આ કહેવત અમેરિકાની બે એજન્સીએ ચરિતાર્થ કરી બતાવી
જ્યારથી ભારતના ચંદ્રયાન-3ની સફળતા મળી છે ત્યારથી આખી દુનિયામાં ચંદ્રને લઈને ફરી એક ચર્ચા શરૂ થઈ ગઈ છે. વૈજ્ઞાનિકો ચંદ્ર પર જીવનની શક્યતા શોધવામાં વ્યસ્ત છે. જો કે દાવા સાથે કહી શકાય નહીં કે ચંદ્ર રહેવા યોગ્ય છે કે નહીં, પરંતુ તે પહેલા લોકોમાં ચંદ્ર પર જમીન ખરીદવાની હરીફાઈ ચાલી રહી છે. હા! લોકો ચંદ્ર પર જમીન ખરીદી રહ્યા છે. ચંદ્ર પર જમીન ખરીદનારાઓમાં ફિલ્મ સ્ટાર્સથી લઈને મોટા ઉદ્યોગપતિઓ ઉપરાંત સામાન્ય માણસોનું નામ પણ સામેલ છે.
અમેરિકાની લુના સોસાયટી ઈન્ટરનેશનલ અને ઈન્ટરનેશનલ લુનાર લેન્ડ્સ રજિસ્ટ્રી જેવી કંપનીઓ ચંદ્રની જમીન વેચવાનો દાવો કરી રહી છે. આ કંપનીઓ ચંદ્રની જમીનની રજિસ્ટ્રી પણ કરાવે છે. આ કંપનીઓ ચંદ્ર પરની એક એકર જમીન લગભગ 3000 રૂપિયામાં વેચી રહી છે. જોકે, આ કંપનીઓ સ્પષ્ટપણે કહે છે કે અમે ચંદ્રની જમીનના માલિક નથી, અમારું કામ માત્ર રજિસ્ટ્રી કરવાનું છે. આ કારણે કોર્ટમાં કંપનીઓ અમારું કામ માત્ર રજિસ્ટ્રી કરવાનું છે તેમ કહીને ટાળે છે.
વર્ષ 1967માં થયેલી સંધિ અનુસાર, તમામ માનવીઓને અવકાશ અને તેના તમામ પ્રાકૃતિક સંસાધનોનો અધિકાર છે અને કોઈપણ દેશ તેના પર દાવો કરી શકે નહીં. અત્યાર સુધીમાં 109 દેશોએ આ સંધિ પર હસ્તાક્ષર કર્યા છે.
વાસ્તવમાં ચંદ્ર પર જમીન વેચવી એ માત્ર એક છેતરપિંડી છે. તેના દ્વારા કંપનીઓ કરોડો રૂપિયાની કમાણી કરી રહી છે. બીજી તરફ, માત્ર રૂ. 3000માં એક એકર જમીનની રજિસ્ટ્રી હોવાને કારણે લોકો માત્ર દેખાડો કરવા માટે આ કામ કરતા અચકાતા નથી.
અહેવાલ અનુસાર, પૃથ્વી પર વસવાટ કરતા વિશ્વના મોટાભાગના દેશોએ ચંદ્રને કોમન હેરિટેજનો દરજ્જો આપ્યો છે. આનો અર્થ એ છે કે કોઈ પણ વ્યક્તિ તેનો વ્યક્તિગત ઉપયોગ માટે ઉપયોગ કરી શકશે નહીં. સામાન્ય વારસો સમગ્ર માનવતા માટે છે. જો કોઈ વ્યક્તિગત ઉપયોગ માટે તેનો ઉપયોગ કરી શકતું નથી. જુલાઈ 1969 માં અમેરિકનો ચંદ્ર પર ઉતર્યા તે પહેલા યુએસ અને સોવિયેત યુનિયન અવકાશ સ્પર્ધામાં સામેલ હતા. દરમિયાન, એવી અટકળો વહેતી થઈ હતી કે જે પણ પહેલા પહોંચશે તે સંસાધનોનો ઉપયોગ કરશે. આ કારણોસર, જાન્યુઆરી 1967 માં, ભારત સહિત 110 દેશોએ આઉટર સ્પેસ ટ્રીટી તરીકે ઓળખાતા કરારમાં પ્રવેશ કર્યો હતો. જેમાં સ્પષ્ટ જણાવાયું હતું કે ચંદ્ર કોઈની માલિકીનો નથી.
હાસ્યાસ્પદ: પ્લોટની નીચેની 5 કિમિ સુધીની જમીનના ખનીજો ઉપર પણ અધિકાર
લુનર રજિસ્ટ્રી વેબસાઈટ દાવો કરે છે કે, ચંદ્રનો માત્ર 2% જ વેચાણ માટે છે. ક્રેટર્સ અને અન્ય ભૌગોલિક સુવિધાઓ તેમજ ઐતિહાસિક ઉતરાણ સ્થળો સુરક્ષિત છે. તેને વેચાણમાં મુકવામાં આવ્યા નથી. આ સાથે એવું પણ કહેવામાં આવ્યું છે કે તમારી પાસે ભૂપ્રદેશની ઊંચાઈથી પાંચ કિલોમીટર નીચેની ઊંડાઈ સુધીના તમામ ખનિજ અધિકારો છે.
ચંદ્ર તો ઠીક, મંગળ અને શુક્ર પર પણ પ્લોટનું વેચાણ!
બીજી એક વેબસાઈટ ’ધ લુનર એમ્બેસી’ પણ ચંદ્ર પર જમીન વેચી રહી છે. આ વેબસાઈટ મંગળ અને શુક્ર પર જમીન વેચવાનો દાવો કરી રહી છે. તેના માલિક ડેનિસ હોપ પૃથ્વી સિવાય સમગ્ર સૂર્યમંડળના વેચાણનો દાવો પણ કરે છે.
જમીન ખરીદવી માત્ર પ્રતિકાત્મક, વાસ્તવિક નહિ!
ચંદ્ર પર જમીનની ખરીદી વાસ્તવિક નથી પરંતુ પ્રતીકાત્મક છે. એક સંધિ અનુસાર, ચંદ્ર કોઈપણ દેશની ખાનગી મિલકત નથી. આના પર કોઈ પોતાનો હક્ક માંગી શકે નહીં. અવકાશ નિષ્ણાતો પણ આ દાવાને ખોટો ગણાવે છે. આ માત્ર પ્રતીકાત્મક નિશાની છે. તેને કોઈ કાનૂની માન્યતા નથી.માત્ર જમીન ખરીદી હોવાનું સર્ટિફિકેટ આપવામાં આવે છે. તે આપણી માલિકીનું બની શકે છે. નહીં કે ચંદ્રની જમીન.
