ખાલિસ્તાની આતંકવાદી હરદીપ સિંહ નિજ્જરની હત્યાને લઈને ભારત અને કેનેડા વચ્ચે તણાવ વધી રહ્યો છે. કેનેડાએ ભારતમાં હાજર તેના 41 રાજદ્વારીઓને પાછા બોલાવ્યા છે. કેનેડાના વિદેશ મંત્રી મેલાની જોલીએ રાજદ્વારીઓને બોલાવવાની માહિતી આપી હતી. તેમણે કહ્યું કે 20 ઓક્ટોબર સુધીમાં 41 કેનેડિયન રાજદ્વારીઓ તેમના પરિવાર સાથે પરત ફર્યા છે. જોલીએ કહ્યું કે અમે બદલો નહીં લઈએ. એટલે કે ભારતીય રાજદ્વારીઓને કેનેડા છોડવાનો આદેશ આપવામાં આવશે નહીં.
ખાલીસ્તાની નેતા નિજ્જરની હત્યા બાદ ઉભો થયેલો વિવાદ વણસ્યો : કેનેડાએ ચંદીગઢ, મહારાષ્ટ્રમાં મુંબઈ અને કર્ણાટકના બેંગલુરૂમાં કોન્સ્યુલેટ સેવાઓ પણ બંધ કરી
મેલાનિયા જોલીએ કહ્યું કે તેમાં કોઈ શંકા નથી કે ભારતના નિર્ણયથી બંને દેશોના સંબંધો પર અસર પડશે. અમે ચંદીગઢ, મહારાષ્ટ્રમાં મુંબઈ અને કર્ણાટકના બેંગલુરુમાં અમારી વ્યક્તિગત કોન્સ્યુલેટ સેવાઓ બંધ કરવાનો નિર્ણય લીધો છે. જોલીએ કહ્યું કે જેમને કોન્સ્યુલર મદદની જરૂર છે તેઓ દિલ્હીમાં અમારા દૂતાવાસમાં જઈ શકે છે. આ સિવાય ફોન અને ઈમેલ દ્વારા પણ અંગત મદદ લઈ શકાય છે.18 સપ્ટેમ્બરે કેનેડાના પીએમ જસ્ટિન ટ્રુડોએ હાઉસ ઓફ કોમન્સમાં કહ્યું હતું કે ખાલિસ્તાની હરદીપ સિંહ નિજ્જરની હત્યામાં ભારતીય એજન્સીઓ સામેલ છે.
ટ્રુડોના આ આરોપ બાદ ભારત અને કેનેડાના સંબંધોમાં તણાવ વધી ગયો હતો. ’ધ એસોસિએટેડ પ્રેસ’ (એપી) એ અગાઉ અહેવાલ આપ્યો હતો કે ભારતે કેનેડાને તેના 62માંથી 41 રાજદ્વારીઓને દૂર કરવા કહ્યું છે. આ પછી કેનેડાના વિદેશ પ્રધાન મેલાની જોલીએ ગુરુવારે કહ્યું કે ભારતમાં 41 રાજદ્વારીઓને સેવામાંથી દૂર કરવામાં આવ્યા છે.
જોલીએ કહ્યું કે બાકીના 21 કેનેડિયન રાજદ્વારીઓ અપવાદ છે અને ભારતમાં જ રહેશે. જોલીએ કહ્યું કે રાજદ્વારી પ્રતિરક્ષા દૂર કરવી એ આંતરરાષ્ટ્રીય કાયદાની વિરુદ્ધ છે અને તેથી જ કેનેડા બદલો લેશે નહીં. અગાઉ, ભારતના વિદેશ મંત્રાલયના પ્રવક્તા અરિંદમ બાગચીએ ભારત પાસે કેનેડિયન રાજદ્વારીઓની સંખ્યા ઘટાડવાની માંગ કરી હતી અને કહ્યું હતું કે કેનેડામાં સેવા આપતા ભારતીય રાજદ્વારીઓની સંખ્યા કરતાં તેમની સંખ્યા વધુ છે.
