એકાએક ૨૦ ઇંચ વરસાદ ખાબકતા ખાના-ખરાબી સર્જાઈ
રોડ-રસ્તાઓ પાણીમાં ગરકાવ, વાહનો ડૂબ્યાં: ફ્લાઈટો રદ્દ કરી દેવાઈ
ઓમાનમાં પ્રકૃતિનું રૌદ્ર સ્વરૂપ જોવા મળ્યું છે. જે વિસ્તારોમાં ૩ કે ૪ ઇંચ વરસાદને ભારે વરસાદ ગણવામાં આવે છે ત્યાં એકસાથે ૨૦ ઇંચ જેટલો વરસાદ ખાબકી ગયાનું જાણવા મળી રહ્યું છે. શાહીન વાવાઝોડાએ ઓમાનમાં તારાજી સર્જી દીધી છે. આ પ્રકૃતિનું રૌદ્ર સ્વરૂપ છે. પ્રકૃતિ સાથે થતી છેડછાડ જ આ ઘટનાઓ પાછળ જવાબદાર છે. કદાચ પ્રકૃતિ આ પ્રકારની ઘટનાઓ થકી ઈશારો કરી રહી છે કે, હજુ પણ માનવી આ બાબતે સજાગ નહીં થાય તો આનાથી પણ ખરાબ પરિસ્થિતિ ઉદ્ભવી શકે છે.
શાહીન વાવાઝોડું રવિવારે ઓમાનમાં જમીન પર ત્રાટક્યું હતું. જેમાં પહેલાથી જ ઓછામાં ઓછા ત્રણ લોકોના જીવ ગયાના સમાચાર છે. ભારે વરસાદ અને વિકરાળ પવનને કારણે દરિયાકાંઠાના વિસ્તારોમાંથી સ્થળાંતર કરવામાં આવ્યું હતું અને રાજધાની મસ્કતથી અને ફ્લાઇટમાં વિલંબ થયો હતો.
વાવાઝોડાના કારણે એક બાળક પાણીમાં વહી ગયું હતું જે બાદ બાળકનો મૃત મળી આવ્યો હતો. રાજ્ય સમાચાર એજન્સીએ જણાવ્યું કે, અન્ય એક વ્યક્તિ ગુમ છે. ઔદ્યોગિક ઝોનમાં તેમના આવાસ વિસ્તાર પર એક ટેકરી તૂટી પડતાં બે એશિયન કામદારોના મોત થયા હોવાનું રાજ્ય સમાચાર એજન્સીએ જણાવ્યું હતું.
ઓમાની અધિકારીઓએ જણાવ્યું કે, ચક્રવાત ૧૨૦ થી ૧૫૦ કિમી પ્રતિ કલાકની ઝડપે પવન વહન કરી રહ્યું હતું. જેના લીધે ૩૨ ફૂટસુધીના તરંગો ફેંકી રહ્યો હતો.
સ્થાનિક બ્રોડકાસ્ટર્સના વિડીયો ફૂટેજમાં દર્શાવવામાં આવ્યું કે, વાહનો પાણીમાં ડૂબી ગયા છે, રોડ-રસ્તા ઠેર ઠેર પાણીમાં ગરકાવ થઈ ગયા છે.
કેટલાક વિસ્તારોમાં 20 ઇંચ સુધીના મોટા પ્રમાણમાં વરસાદની અપેક્ષા રાખવામાં આવી હતી, જે સંભવિત રીતે અચાનક પૂર લાવશે.
ઓમાન રાષ્ટ્રીય કટોકટી સમિતિએ જણાવ્યું હતું કે, અકસ્માતો ટાળવા માટે રાજધાનીની પૂર્વમાં અલ-કુર્મમાં વીજ પુરવઠો કાપી નાખવામાં આવ્યો હતો. ૨૭૦૦ થી વધુ લોકોને ઇમરજન્સી આશ્રયસ્થાનોમાં રાખવામાં આવ્યા હતા.
તેલ નિકાસ કરનારા દેશના પચાસ લાખ લોકોમાંથી મોટાભાગના મસ્કત અને તેની આસપાસ રહે છે. સતાધીશોએ જણાવ્યું હતું કે, રાજધાનીમાં રસ્તાઓ માત્ર કટોકટી અને માનવતાવાદી મુસાફરીના વાહનો માટે ખુલ્લા રહેશે જ્યાં સુધી તોફાનની અસર પૂર્ણ ન થઈ જાય.
સંયુક્ત આરબ અમીરાતમાં, અધિકારીઓએ કહ્યું કે સાવચેતીનાં પગલાં લેવામાં આવી રહ્યા છે. પોલીસ અધિકારીઓ દરિયાકિનારા અને ખીણોની નજીક સુરક્ષા પેટ્રોલિંગ કરીને સલામતી સુનિશ્ચિત કરવા આગળ વધી રહ્યા હતા જ્યાં મુશળધાર વરસાદની અપેક્ષા હતી.
સાઉદી અરેબિયાના નાગરિક સંરક્ષણ અધિકારીઓએ ભારે પવન અને સંભવિત પૂરની અપેક્ષાએ સોમવારથી શુક્રવાર સુધી કેટલાક વિસ્તારોમાં સાવચેતી રાખવાની હાકલ કરી હતી.
