દૂધ પીવડાવી ઉછેરેલો સાપ ડંખ પણ મારે
બલૂચ લિબરેશન આર્મી નામના આતંકી સંગઠને પંજગુર અને નૌશ્કી જિલ્લામાં આવેલા આર્મીના બે કેમ્પ ઉપર કર્યા હુમલા
પાકિસ્તાનના અશાંત દક્ષિણ-પશ્ચિમ બલૂચિસ્તાન પ્રાંતમાં સશસ્ત્ર હુમલાખોરોએ સુરક્ષા દળોના બે કેમ્પ પર હુમલો કર્યા બાદ ભીષણ ગોળીબારમાં ઓછામાં ઓછા 13 આતંકવાદીઓ માર્યા ગયા હતા. સેનાએ કહ્યું કે આ ઘટનામાં સાત જવાનોના પણ મોત થયા છે.
પ્રતિબંધિત બલૂચ લિબરેશન આર્મીએ પંજગુર અને નૌશ્કી જિલ્લામાં થયેલા હુમલાની જવાબદારી સ્વીકારી છે. પંજગુરમાં, હુમલાખોરોએ બે સ્થળોએથી સુરક્ષા દળોના કેમ્પમાં પ્રવેશવાનો પ્રયાસ કર્યો, જ્યારે નૌશ્કીમાં તેઓએ ફ્રન્ટિયર કોર્પ્સ પોસ્ટમાં ઘૂસવાનો પ્રયાસ કર્યો. પાકિસ્તાની સેનાના નિવેદન અનુસાર, બંને ચોકીઓ પર હુમલાખોરોને તટસ્થ કર્યા પછી, સુરક્ષા દળોએ વિસ્તારમાં છુપાયેલા આતંકવાદીઓને શોધવા માટે એક ઓપરેશન શરૂ કર્યું.
ગૃહમંત્રી શેખ રાશિદ અહેમદે એક વીડિયો સંદેશમાં જણાવ્યું કે નૌશ્કીમાં નવ આતંકવાદીઓ અને ચાર સૈનિકો માર્યા ગયા. તેને આતંકવાદ સામે મોટી સફળતા ગણાવતા તેમણે કહ્યું કે, પાકિસ્તાન સેનાએ બંને જગ્યાએથી આતંકવાદીઓને ભગાડી દીધા છે. પંજગુરમાં સેનાએ ચારથી પાંચ લોકોને ઘેરી લીધા છે અને તેઓ હારશે.
વડાપ્રધાન ઈમરાન ખાને બલૂચિસ્તાનમાં કેમ્પો પર આતંકી હુમલાને નિષ્ફળ બનાવવા માટે સુરક્ષા દળોને ટ્વિટર પર અભિનંદન પાઠવ્યા હતા. અગાઉ, સૈન્યની મીડિયા શાખા ઇન્ટર-સર્વિસ પબ્લિક રિલેશન્સ એ એક નિવેદનમાં જણાવ્યું હતું કે, બંને હુમલાઓનો યોગ્ય જવાબ આપવામાં આવ્યો હતો.
ફ્રન્ટિયર કોર્પ્સના પ્રવક્તાએ પંજગુર અને નૌશ્કી ખાતેના કેમ્પની નજીક બે વિસ્ફોટોની પુષ્ટિ કરી હતી, જેના પગલે ભીષણ ગોળીબાર થયો હતો. બીએલએએ એક નિવેદન જારી કરીને આ હુમલાઓની જવાબદારી સ્વીકારી છે. અલગતાવાદી સંગઠને તાજેતરમાં સુરક્ષા દળો અને સ્થાપનો પર હુમલા તેજ કર્યા છે. એક અઠવાડિયા પહેલા, પ્રાંતના કેચ જિલ્લામાં સુરક્ષા દળોની ચેકપોસ્ટ પર આતંકવાદી હુમલામાં 10 જવાનો શહીદ થયા હતા.
