ઇ–વે બિલના નિયમો સરળ બનાવાયા: વાહન ગમે તેટલાં રાજ્યમાંથી પસાર થાય,માત્ર એક વખત જ ચેક થઈ શકશે
૧ ફેબ્રુઆરીના રોજ ઇ-વે બિલના અમલની સાથે જ સિસ્ટમ ખોરવાઈ ગઈ હતી અને ગુજરાતમાં ૨૦ ફેબ્રુઆરી સુધી તેનો અમલ મોકૂફ રાખવાની જાહેરાત કરવામાં આવી હતી અને હવે વેપાર-ઉદ્યોગે ઇ-વે બિલના અમલમાં સૂચવેલા સુધારા ગુરુવારે નવી દિલ્હી ખાતે યોજાનારી જીએસટી લો કમિટીની બેઠકમાં ચર્ચાશે. ગુજરાતના સ્ટેટ ટેક્સ કમિશનર ડો. પી ડી વાઘેલાએ જણાવ્યું હતું કે ઇ-વે બિલ અંગે વેપારીઓએ કોઈ પ્રકારનો ગભરાટ રાખવો ના જોઈએ.
ગુજરાત ચેમ્બર ઓફ કોમર્સ એન્ડ ઇન્ડસ્ટ્રી (જીસીસીઆઇ) ખાતે ગુજરાત સરકારના જીએસટી ડિપાર્ટમેન્ટ, જીસીસીઆઇ અને સ્ટીલ યુઝર્સ ફેડરેશન ઓફ ઇન્ડિયા (સુફી)ના સંયુક્ત ઉપક્રમે જીએસટી અને ઇ-વે બિલના પરિસંવાદમાં ડો. પી ડી વાઘેલાએ જણાવ્યું હતું કે, ઇ-વે બિલના અમલમાં ટેક્નિકલ ખામી જોવા મળી હતી તેથી તેનો અમલ મુલતવી રાખવામાં આવ્યો છે અને તેના પર હાલમાં કામ ચાલી રહ્યું છે.
ભારત સરકાર જ્યારે તેનો અમલ કરવાનું નક્કી કરશે ત્યારે ગુજરાત તેમાં જોડાશે. ઇ-વે બિલના નિયમો સરળ બનાવવામાં આવ્યા છે. વેપારીનું વાહન ગમે તેટલાં રાજ્યમાંથી પસાર થાય તો પણ માત્ર એક વખત જ ચેક થઈ શકશે.
એક વખત ચેક થયેલા વાહનને બીજી વખત રોકવામાં આવે તો તે અગાઉ ચેક થઈ ગયું હોવાનો પુરાવો આપતાં જ બીજી વખત કોઈ રાજ્યમાં તેનું ફરી ચેકિંગ નહીં થાય. આ ઉપરાંત કોઈ પણ સરકારી એજન્સી જો વાહન રોકે તો તેમણે ૩૦ મિનિટમાં પોતાનું ચેકિંગ પૂરું કરવાનું રહેશે. જો તેમ ના થાય તો વેપારી તે અધિકારી સામે ઓનલાઇન ફરિયાદ કરી શકશે.
તેમણે કહ્યું હતું કે જીએસટી લો કમિટીની ગુરુવારે યોજાનારી બેઠકમાં ઇ-વે બિલની ચર્ચા થશે અને તેમાં ગુજરાતના વેપાર-ઉદ્યોગે આપેલાં સૂચનો પણ રજૂ કરવામાં આવશે.
જીએસટીમાં પેન્ડિંગ રિફંડો અંગે તેમણે કહ્યું હતું કે, એસજીએસટી રિફંડ બાબતે દૈનિક ધોરણે સમીક્ષા કરવામાં આવી રહી છે.
વેપારીઓને ફિઝિકલ ડોક્યુમેન્ટ્સ સબમિટ કરવાના બાકી હોવાથી જે રિફંડ પેન્ડિંગ છે તેમાં પણ ઝડપી કાર્યવાહી થઈ રહી છે. કસ્ટમ્સ અને એક્સાઇઝ વિભાગની સાથે મળીને અમે ઝડપી રિફંડ માટે સતત કાર્યરત છીએ.
નિકાસના આઇજીએસટી રિફંડ બાકી છે તેમાં એવું ધ્યાનમાં આવ્યું છે કે વેપારીઓ માલ વેચે ત્યારે કોમર્શિયલ ઈનવોઇસ બનાવે છે જેમાં એસજીએસટી, આઇજીએસટી સહિતની વિગતો હોય છે અને ત્યાર બાદ નિકાસ માટે ઇન્ટરનેશનલ ઈનવોઇસ બનાવે છે જેમાં આ ટેક્સનો સમાવેશ થતો હોતો નથી. અમે આ મુદ્દાનો ઉકેલ લાવવા માટે મેન્યુઅલ હેન્ડલિંગ કરવાનું પણ નક્કી કર્યું છે.
