બગોદરા રોડ ઉપર તારાપુર ત્રણ રસ્તા પરથી રૂા. 27.60 લાખનો દારૂનો જથ્થો ભરેલી ટ્રક પકડાઈ હતી. ટ્રકમાં ચોરખાનું બનાવી સેન્ટિંગના બ્લોક નાખી તેની આડમાં દારૂ લઈ જવાતો હતો. રાજસ્થાનથી રાજકોટ દારૂ લઈ જવાનો હતો. બગોદરા પોલિસ સ્ટેશનના પીએસઆઈ જી.કે. ચાવડાને બાતમી મળી હતી કે ટ્રકમાં ચોરખાનું બનાવી ઉપર સેન્ટીંગમાં વપરાતા બ્લોક નાખી તેની આડમાં રાજસ્થાનથી ગુજરાતમાં વાયા બગોદરા થઈ રાજકોટ દારૂ લઈ જવાઈ રહ્યો છે.
તારાપુર ત્રણ રસ્તા પર બાતમીવાળી ટ્રક દેખાતા તેને અટકાવી ડ્રાઇવરને શિવરતન ઓમપ્રકાશ અગ્રવાલની ધરપકડ કરી હતી. ટ્રકમાં તપાસ કરતા સેન્ટિંગમાં વપરાતા બ્લોક નીચે ચોરખાનામાં રૂા. 27.60 લાખનો ભારતીય બનાવટનો વિદેશી દારૂની 460 પેટી મળી આવી હતી. પોલીસે ટ્રક, મોબાઈલ સહિત કુલ રૂા. 37.65 લાખનો મુદ્દામાલ કબજે કર્યો હતો. બગોદરા પોલીસે ટ્રક અને ટ્રકચાલકને કબજે લઇ માલ મોકલનાર તથા માલ મંગાવનારને ઝડપી પાડવા આગળની તપાસ શરૂ કરી છે.
