પારકી આશા સદા નિરાશા…
ભારતે સેમિફાઇનલમાં પહોંચવા આગામી ત્રણેય મેચ મોટા માર્જિનથી જીતવા અત્યંત જરૂરી
અબતક, અબુધાબી
ટી-20 વર્લ્ડ કપ 2021ની 31મી મેચમાં પાકિસ્તાને નામીબિયને એકતરફી મેચમાં 45 રનથી હરાવીને શાનદાર જીત નોંધાવી હતી. આ જીત સાથે પાકિસ્તાન ટી 20 વર્લ્ડ કપ 2021 ની સેમી ફાઇનલમાં પહોંચી ગયું છે. સેમીફાઈનલમાં પહોંચનારી પાકિસ્તાન બીજી ટીમ છે. ઈંગ્લેન્ડે પહેલા સેમિફાઈનલમાં સ્થાન નિશ્ચિત કર્યું હતું. ગ્રુપ 2માં પાકિસ્તાને અત્યાર સુધી રમાયેલી તેની તમામ 4 મેચ જીતી છે.
આ પહેલા તેણે ભારત, ન્યુઝીલેન્ડ, અફઘાનિસ્તાન અને હવે નામિબિયાને હરાવીને છેલ્લા 4માં સ્થાન મેળવ્યું છે. પાકિસ્તાને પાંચમી વખત ટી 20 વર્લ્ડ કપની સેમીફાઈનલમાં જગ્યા બનાવી છે, આ સિદ્ધિ મેળવનારી તે વિશ્વની એકમાત્ર ટીમ છે
એક તરફ પાકિસ્તાને સેમિફાઇનલની ટીકીટ કપાવી લીધી છે તો બીજી બાજુ ભારતે રમેલાં બંને મેચમાં શરમજનક હાર થઈ છે. હવે ભારતે સેમિફાઇનલમાં પહોંચવા આજે અફઘાનિસ્તાનને તો હરાવવું જ પડશે પણ આગામી વધુ 2 મેચ પણ મોટા માર્જિનથી જીતવા પડશે. આ કરવા છતાં પણ ભારતની વાત નહીં બને અફઘાનની ટીમ જો ન્યુઝીલેન્ડને હરાવી દે તો જ ભારત સેમિફાઇનલમાં પહોંચી શકશે જેની સાંભવના હાલના તબક્કે નહીવત લાગે છે.
પાકિસ્તાને ટોસ જીતીને પ્રથમ બેટિંગ કરવાનો નિર્ણય લીધો હતો અને 20 ઓવરમાં 189 રનનો વિશાળ લક્ષ્યાંક આપ્યો હતો. જવાબમાં નામિબિયાની ટીમ 144 રન જ બનાવી શકી હતી. ફરી એકવાર બાબર આઝમ અને મોહમ્મદ રિઝવાને મોટી ભાગીદારી નોંધાવી બેટિંગ કરી હતી. રિઝવાને 50 બોલમાં અણનમ 79 રન બનાવ્યા હતા, જ્યારે બાબર આઝમે 49 બોલમાં 70 રન બનાવ્યા હતા. મોહમ્મદ હફીઝે પણ 16 બોલમાં અણનમ 32 રન બનાવ્યા હતા.
ટોસ જીત્યા બાદ પાકિસ્તાને પ્રથમ બેટિંગ કરવાનો નિર્ણય કર્યો, ત્યાર બાદ બાબર અને રિઝવાનની ઓપનિંગ જોડીએ ટીમને ધીમી શરૂઆત અપાવી. નામિબિયાની સાંકડી બોલિંગ સામે પાકિસ્તાનના બેટ્સમેનો ત્રણ ઓવરમાં માત્ર 6 રન જ બનાવી શક્યા હતા.
રિઝવાને પણ સ્મિત પર પ્રથમ બાઉન્ડ્રી ફટકારી હતી. પાવર પ્લેમાં પાકિસ્તાને એકપણ વિકેટ ગુમાવ્યા વિના માત્ર 29 રન બનાવ્યા હતા. બાબર અને રિઝવાન નામિબિયાના બોલરોથી સતત પરેશાન હતા. બોલે ઘણી વખત બેટની બહારની અને અંદરની કિનારી લીધી, પરંતુ નામિબિયાને વિકેટ મળી ન હતી. પાકિસ્તાનના રનની અડધી સદી 9મી ઓવરમાં પૂરી થઈ ગઈ હતી.
રિઝવાને ઇનિંગની પહેલી સિક્સ રૂબેન ટ્રમ્પલમેન પર ફટકારી હતી. બાબરે આ ઝડપી બોલર પર બે રનની મદદથી 40 બોલમાં પોતાની અડધી સદી પૂરી કરી હતી. રિઝવાને જેન નિકોલ લોફ્ટી ઈટનના બોલને પણ પ્રેક્ષકો સુધી પહોંચાડ્યો હતો. પાકિસ્તાનની ટીમ 13મી ઓવરમાં 100 રનનો સ્કોર પાર કરવામાં સફળ રહી હતી.
બાબર અને રિઝવાન ટી 20 ઇન્ટરનેશનલમાં પાંચ શતકીય ભાગીદારી કરનાર પ્રથમ જોડી છે. વિઝાના બોલ પર મોટો શોટ રમવાના પ્રયાસમાં બાબરે ડીપ મિડવિકેટ પર જેન ફ્રાયલિંકને કેચ આપ્યો હતો. તેણે 49 બોલનો સામનો કરતી વખતે સાત ચોગ્ગા ફટકાર્યા હતા. ત્યારબાદ ફ્રાયલિંક (31 રનમાં એક વિકેટ) ફખર ઝમાનને પેવેલિયન મોકલ્યો હતો, જેણે 5 રન બનાવ્યા હતા.
મોહમ્મદ હફીઝે આવતાની સાથે જ સ્મિત પર સતત બે ચોગ્ગા ફટકાર્યા અને પછી ટ્રમ્પલમેન પર પણ સતત બે ચોગ્ગા ફટકાર્યા. રિઝવાને ટ્રમ્પલમેન પર ચોગ્ગા અને વાઇસી પર છગ્ગાની મદદથી 42 બોલમાં પોતાની અડધી સદી પૂરી કરી હતી. રિઝવાને છેલ્લી ઓવરમાં સ્મિતના ચાર ચોગ્ગા અને એક છગ્ગા સાથે 24 રન બનાવ્યા હતા, કારણ કે પાકિસ્તાનની ટીમ છેલ્લી 11 ઓવરમાં 139 રન જોડવામાં સફળ રહી હતી. સ્મિતે ચાર ઓવરમાં 50 રન આપ્યા અને તેને કોઈ વિકેટ મળી ન હતી.
નામિબિયા માટે, વિઝા અને વિલિયમ્સ સારી ઇનિંગ્સ રમ્યા હતા અને સરળતાથી ઘૂંટણિયે પડ્યા ન હતા. ઓપનિંગમાં સ્ટીફન બાર્ડે 29 રનની ઇનિંગ રમી હતી. ક્રેગ વિલિયમ્સે 40 રન બનાવ્યા હતા. આ સાથે જ ડેવિડ વિસાએ 31 બોલમાં અણનમ 43 રન બનાવ્યા હતા. પાકિસ્તાન તરફથી હસન અલી, ઈમાદ વસીમ, રઉફ અને શાદાબ ખાને 1-1 વિકેટ લીધી હતી.
