વૈશ્વિક અર્થતંત્રની સુનામીમાંથી ભારત ઉગરી શકશે ?
સ્વિટ્ઝર્લેન્ડ સ્થિત આ બેન્કના શેરમાં એક જ દિવસમાં 30 ટકાનો ગાબડું : બેંકની સૌથી મોટી શેરધારક ‘સાઉદી નેશનલ બેન્ક’એ વધુ રોકાણ કરવાનો નનૈયો ભણ્યો
બેંકિંગ કટોકટી હવે માત્ર અમેરિકા પુરતી સીમિત નથી રહી, પરંતુ યુરોપમાં પણ તે વધુ ઘેરી બની રહી છે. યુરોપની સૌથી મોટી બેંકોમાંની એક ક્રેડિટ સુઈસની હાલત ખરાબ છે. તેના શેરમાં એક જ દિવસમાં 30 ટકાનો ઘટાડો થયો હતો. આટલું જ નહીં, માત્ર ત્રણ મહિનામાં ઘટાડાને કારણે બેન્ક સ્ટોક્સની કિંમત એક તૃતિયાંશ નીચે આવી ગઈ છે. તેવામાં એ પ્રશ્ન સર્જાયો છે કે આ વૈશ્વિક અર્થતંત્રની સુનામીમાંથી ભારત ઉગરી શકશે કે કેમ ?
ક્રેડિટ સુઈસ બેંક છેલ્લા કેટલાક સમયથી સતત પડકારોનો સામનો કરી રહી છે. શેરની કિંમતમાં સતત ઘટાડો થવાને કારણે બેંકના શેરધારકો પણ તેને છોડવા લાગ્યા છે. સ્વિટ્ઝર્લેન્ડ સ્થિત ક્રેડિટ સુઈસ બેન્કમાં 9.9 ટકા હિસ્સા સાથે, સૌથી મોટી શેરધારક ’સાઉદી નેશનલ બેન્ક’એ વધુ રોકાણ કરવાનો ઇનકાર કર્યો છે.
બ્લૂમબર્ગના અહેવાલ મુજબ, ક્રેડિટ સુઈસમાં તેની ખરાબ સ્થિતિ વચ્ચે રોકાણ કરવા અંગેના પ્રશ્નના જવાબમાં, સાઉદી નેશનલ બેંકના ચેરમેન અમ્મર-અલ ખુદાઈરીએ કહ્યું કે અમારો જવાબ ના છે… અમે ક્રેડિટ સુઈસમાં કોઈપણ પ્રકારનું રોકાણ કરીશું નહીં. ખુદાઈરીએ તેનું પગલું પાછું લેવાનું સૌથી મોટું કારણ રેગ્યુલેટરી અને કાનૂની પડકારોને ટાંક્યા છે.જોકે, ક્રેડિટ સુઈસ બેંક દ્વારા હજુ પણ એવું કહેવામાં આવી રહ્યું છે કે તેની પાસે પૂરતી થાપણો છે અને બેંક ડૂબવાનો કોઈ ભય નથી.
સ્થિતિ સુધારવા સ્વિસ બેન્ક પાસેથી રૂ.4.5 લાખ કરોડની લોન લેવાશે
ક્રેડિટ સુઈસ ગ્રુપની લાંબા સમયથી ચાલતી મુશ્કેલીઓ બુધવારે મોટી કટોકટીમાં ફેરવાઈ ગઈ હતી કારણ કે તેના શેરો અને બોન્ડમાં ઘટાડો થયો હતો, જેના કારણે ક્રેડિટ સુઈસ મંદ પડી ગઈ હતી. હવે ક્રેડિટ સુઈસે સ્વિસ બેંક પાસેથી 54 બિલિયન ડોલર એટલે કે 4.5 લાખ કરોડની લોન લેવાનું નક્કી કર્યું છે. ક્રેડિટ સુઈસે ગુરુવારે જણાવ્યું હતું કે તે સ્વિસ નેશનલ બેંકમાંથી ઉધાર લેવાના તેના વિકલ્પનો ઉપયોગ કરીને તેની રોકડ વધારવા માટે કામ કરી રહી છે.
અમેરિકાનું સંકટ યુરોપ સુધી પહોંચ્યુ
અમેરિકાના બેન્કિંગ સેક્ટરમાં આવેલી સુનામી હવે યુરોપિયન બેન્કોને પોતાની ઝપેટમાં લઈ રહી છે. જેના કારણે સમગ્ર વિશ્વની બેંકો પર તેની અસર જોવા મળી રહી છે. યુ.એસ.માં પહેલા સિલિકોન વેલી અને પછી સિગ્નેચર બેંકને તાત્કાલિક તાળાં મારી દેવામાં આવ્યા હતા. જ્યારે અડધો ડઝન જેટલી અન્ય અમેરિકન બેંકો બંધ થવાનું જોખમ વધી ગયું છે. વૈશ્વિક રેટિંગ એજન્સી મૂડીઝે પણ ફર્સ્ટ રિપબ્લિક બેંક સહિત અનેક નાણાકીય સંસ્થાઓને સમીક્ષા હેઠળ મૂકી છે.
