રાજસ્થાન, મધ્યપ્રદેશ અને છત્તીસગઢમાં મોદી મેજીક!

નેશનલ ન્યૂઝ

ચાર રાજ્યમાંથી ત્રણમાં ભાજપની ભવ્ય જીત, તેલંગણામાં કોંગ્રેસે બીઆરએસને ગાદી પરથી હટાવી: ચારેય રાજ્યોમાં કોણ બનશે મુખ્યમંત્રી, ભારે સસ્પેન્સ: મિઝોરમમાં મતગણતરી શરૂ, સાંજે ચિત્ર સ્પષ્ટ થશે

મોદી લહેર પર સવાર થઈને ભાજપે રાજસ્થાન, મધ્યપ્રદેશ અને છત્તીસગઢમાં મોટી જીત નોંધાવી છે. મધ્યપ્રદેશમાં જ્યાં ભાજપ ફરી સત્તામાં આવી છે. આ સાથે જ રાજસ્થાન અને છત્તીસગઢમાં કોંગ્રેસને સત્તા પરથી હટાવવામાં આવી છે. તે જ સમયે, કોંગ્રેસે તેલંગાણામાં બીઆરએસને ગાદી પરથી હટાવી દીધી છે. પરિણામો બાદ હવે ભાજપમાં નવી દોડધામ શરૂ થઈ છે. મુખ્યમંત્રી પદ સુધી હોંચવાની આ રેસ છે. આ ત્રણેય રાજ્યોમાં ભાજપ પાસે જૂના અને અનુભવી ચહેરાઓ છે, પરંતુ સવાલ એ છે કે શું ભાજપ જૂના પર વિશ્વાસ કરશે કે નવા ચહેરાને લાવશે. જો કે, ભાજપે જે રીતે બમ્પર જીત ધાવી છે અને ભાજપના ટ્રેક રેકોર્ડને જોતા એવું લાગે છે કે ભાજપ નવી નેતાગીરી તૈયાર કરી શકે છે. ભાજપનું કેન્દ્રીય નેતૃત્વ હંમેશા નવા અને યુવાનોને જવાબદારી આપવાની વાત કરે છે. સાથે જ સવાલ એ પણ છે કે તેલંગાણામાં કોંગ્રેસનો ચહેરો કોણ હશે?

મિઝોરમ વિધાનસભા ચૂંટણી માટે મતગણતરી શરૂ થઈ ગઈ છે. આજે યોજાનારી મતગણતરી માટે ચુસ્ત સુરક્ષા વ્યવસ્થા કરવામાં આવી છે. આ વખતે સત્તારૂઢ મિઝો નેશનલ ફ્રન્ટ , જોરમ પીપલ્સ મુવમેન્ટ અને કોંગ્રેસ વચ્ચે ત્રિકોણીય મુકાબલાની અપેક્ષા છે. મિઝોરમ વિધાનસભા ચૂંટણી માટે આજે જાહેર થયેલા મતોની ગણતરીના પ્રારંભિક વલણોમાં, વિપક્ષ જોરમ પીપલ્સ મૂવમેન્ટ એ રાજ્યમાં સત્તારૂઢ મિઝો નેશનલ ફ્રન્ટ પર લીડ મેળવી છે.

રાજસ્થાન

રાજસ્થાનમાં ભાજપે પરંપરા જાળવી રાખીને જીત નોંધાવી છે. અહીં પૂર્વ મુખ્યમંત્રી વસુંધરા રાજે 2003થી ભાજપનો ચહેરો છે, પરંતુ ભાજપે આ ચૂંટણીમાં કોઈને પોતાનો ચહેરો બનાવ્યો નથી. શું વસુંધરાને સીએમ બનાવવામાં આવશે? જો કે, છેલ્લા પાંચ વર્ષમાં કેન્દ્રીય નેતૃત્વ સાથે તેમની ખેંચતાણ જોતાં આ શક્યતા ચોક્કસપણે ઓછી જણાય છે. ભાજપે સેફ સીટ પરથી સાંસદ દિયા કુમારીને પણ મેદાનમાં ઉતાર્યા હતા. તેના ઉપર પણ મદાર છે. ચૂંટણી દરમિયાન પણ આ અંગે ઘણી ચર્ચા થઈ હતી. દિયા કુમારીને મુખ્યમંત્રી પદની પ્રબળ દાવેદાર માનવામાં આવી રહી છે. અલવરના સાંસદ બાલકનાથનું નામ પણ ચાલી રહ્યું છે, ભાજપે તેમને પણ તિજારા સીટ પરથી ચૂંટણી લડાવ્યા છે. બાલકનાથ નાથ સંપ્રદાયમાંથી આવે છે. ઉત્તર પ્રદેશના સીએમ યોગી આદિત્યનાથ એ જ સંપ્રદાયમાંથી આવે છે. બાલકનાથ રોહતકના બાબા મસ્તનાથ મઠના મહંત છે અને તેમને રાજસ્થાનના યોગી પણ કહેવામાં આવે છે. ખેર, અહીં મુખ્યમંત્રી પદના દાવેદારોની કમી નથી. પ્રદેશ અધ્યક્ષ સીપી જોશીથી લઈને કેન્દ્રીય મંત્રી ગજેન્દ્ર સિંહ શેખાવત, અર્જુન મેઘવાલથી લઈને કિરોની લાલ મીના સુધીના નામ ચર્ચામાં છે. જો કે, ભાજપમાં મજાકમાં એવું પણ કહેવાય છે કે જેનું નામ લોકપ્રિય છે, તેનું નામ કપાઈ ગયું છે.

કેવો રહ્યો વોટશેર?

રાજસ્થાનમાં ભાજપને 41.69 ટકા વોટ મળ્યા છે. જ્યારે કોંગ્રેસને 39.53 ટકા વોટ મળ્યા છે. બન્ને વચ્ચે વોટ શેરનો તફાવત 2.2 ટકાનો છે. રાષ્ટ્રીય લોકતાંત્રિક પાર્ટીને 2.4 ટકા, બીએસપીને 1.8 ટકા અને નોટાને 0.96 ટકા વોટ મળ્યા છે. રાજસ્થાનમાં 199 સીટોમાંથી ભાજપે 116 બેઠકો પર વિજય મેળવ્યો છે. કોંગ્રેસે 69 સીટ પર જીત મેળવી છે. ભારત આદીવાસી પાર્ટીએ 3 સીટ પર જીત મેળવી છે. બહુજન સમાજવાદી પાર્ટીએ 2, રાષ્ટ્રીય લોક દળે 1, રાષ્ટ્રીય લોકતાંત્રિક પાર્ટીએ 1 અને અપક્ષોએ 8 સીટો પર જીત મેળવી છે.

મધ્યપ્રદેશ

શિવરાજ સિંહે કઠિન પીચમાં પ્રવેશ કર્યો અને મધ્યપ્રદેશમાં ભાજપે જંગી જીત નોંધાવી છે. જોકે, ભાજપે વડાપ્રધાન મોદીના નામે ચૂંટણી લડી હતી. આવી સ્થિતિમાં મોટો સવાલ એ છે કે જ્યારે શિવરાજના નામ પર ચૂંટણી લડાઈ ન હતી ત્યારે શું ભાજપ તેમને મુખ્યમંત્રી બનાવશે? જો ભાજપ આસામના મોડલને અનુસરે છે તો તે મમતા માટે ફટકો બની શકે છે. જો ભાજપ બહુમતીના આંકડાની નજીક હોત તો શિવરાજના સીએમ બનવાની વધુ તકો હતી, પરંતુ આ જંગી બહુમતી સાથે ભાજપ પાસે પ્રયોગ કરવાની પૂરેપૂરી તક છે. એવું પણ કહેવામાં આવી રહ્યું છે કે શું ભાજપ લોકસભા ચૂંટણી પહેલા પ્રયોગ કરશે? કેન્દ્રીય મંત્રી જ્યોતિરાદિત્ય સિંધિયાના નામ પર પણ મુખ્યમંત્રી બનવા માટે વિચારણા કરવામાં આવી રહી છે.
જો કે, તેમના જૂના કોંગ્રેસી હોવાને કારણે પક્ષમાં જૂથવાદ વધી શકે છે અને ભાજપ લોકસભાની ચૂંટણી પહેલાં કોઈ વિક્ષેપ ઇચ્છતું નથી. આ રેસમાં કેન્દ્રીય મંત્રી નરેન્દ્ર સિંહ તોમરનો દાવો પણ મજબૂત માનવામાં આવે છે. કૈલાશ વિજયવર્ગીયથી લઈને પ્રદેશ અધ્યક્ષ વીડી શર્માનું નામ પણ ચર્ચામાં છે. પ્રહલાદ પટેલથી લઈને આદિવાસી નેતા ફગ્ગન સિંહ કુલસ્તે સુધીના નામ પણ ઓબીસી નેતાઓ તરીકે લેવામાં આવી રહ્યા છે. જો કે, ભાજપે ઘણા પ્રસંગોએ બતાવ્યું છે કે તે એવા નામો આગળ લાવે છે જેની ક્યાંય ચર્ચા થતી નથી.

કેવો રહ્યો વોટ શેર?

મધ્ય પ્રદેશમાં ભાજપે ઐતિહાસિક જીત મેળવી છે. ભાજપને સૌથી વધારે 48.55 ટકા વોટ શેર મળ્યા છે. કોંગ્રેસને 40.40 ટકા વોટ શેર મળ્યા છે. આમ બન્ને વચ્ચેનો તફાવત લગભગ 8 ટકા છે. બીએસપીને 3.40 ટકા વોટ શેર મળ્યા છે. મધ્ય પ્રદેશની 230 વિધાનસભામાં સીટોમાંથી ભાજપે 166 બેઠકો પર વિજય મેળવ્યો છે. કોંગ્રેસે 66 સીટ પર જીત મેળવી છે. ભારત આદીવાસી પાર્ટીએ 1 સીટ પર જીત મળી છે.

છત્તીસગઢ

છત્તીસગઢમાં પણ ભાજપે વડાપ્રધાન નરેન્દ્ર મોદીના નામે ચૂંટણી લડી હતી અને જીતનો શ્રેય પણ મોદી અને મોદીની ગેરેન્ટીને જાય છે. અહીં રમણ સિંહ 2003 થી 2018 સુધી ભાજપના મુખ્યમંત્રી હતા અને આ વખતે પણ ચૂંટણી જીત્યા છે. જો કે ભાજપ તેમને ફરી તક આપશે કે કેમ તે અંગે શંકા છે. મુખ્યમંત્રી પદ માટે પ્રદેશ અધ્યક્ષ અરુણ સાવના નામનો પણ ઉલ્લેખ કરવામાં આવી રહ્યો છે. તેઓ ઓબીસી નેતા છે અને ઓબીસી સમુદાયના સાહુ સમુદાયમાંથી આવે છે.
છત્તીસગઢમાં સાહુ સમુદાયની વસ્તી લગભગ 12 ટકા છે. કેન્દ્રીય રાજ્ય મંત્રી રેણુકા સિંહના નામની પણ ચર્ચા થઈ રહી છે. તેણી આદિવાસી સમુદાયમાંથી આવે છે અને આ વખતે ભાજપે તેણીને વિધાનસભાની ચૂંટણી લડાવી હતી. આદિવાસી નેતા લતા ઉસેન્ડીનું નામ પણ રેસમાં હોવાનું કહેવાય છે.

કેવો રહ્યો વોટ શેર?

ભારતીય જનતા પાર્ટીને આ વખતે સૌથી વધારે 46.3 ટકા વોટ મળ્યા છે. કોંગ્રેસને 42.33 ટકા વોટ મળ્યા છે. બન્ને વચ્ચે 4 ટકા વોટ શેરનો તફાવત છે. બીએસપીને 2.05 ટકા અને નોટાને 1.26 ટકા વોટ મળ્યા છે. છત્તીસગઢમાં 90 સીટોમાંથી ભાજપે 54 બેઠકો પર જીત મેળવી છે. કોંગ્રસે 35 બેઠકો જીતી છે. જીજીપીએ 1 બેઠક પર જીત મેળવી છે.

તેલંગાણા

કોંગ્રેસની સરકાર બન્યા બાદ રાજ્યના મુખ્યમંત્રી કોણ બનશે તેની પણ ચર્ચા શરૂ થઈ ગઈ છે. જેમાં તેલંગાણા પ્રદેશ કોંગ્રેસ સમિતિના પ્રમુખ રેવન્ત રેડ્ડીનું નામ આગળ છે. જો કે અન્ય નેતાઓએ પણ મુખ્યમંત્રી બનવાની ઈચ્છા વ્યક્ત કરી છે. તેલંગાણામાં કોંગ્રેસની સરકાર બન્યા બાદ તેલંગાણા કોંગ્રેસ એકમના પ્રમુખ રેવન્ત રેડ્ડીનું નામ મુખ્યમંત્રી પદની રેસમાં સૌથી આગળ છે. રેડ્ડીએ 2019માં કોંગ્રેસની ટિકિટ પર લોકસભા ચૂંટણી પણ જીતી હતી. આ સાથે જ તેલંગાણામાં કોંગ્રેસને પુન:સ્થાપિત કરવામાં તેમનો મોટો ફાળો હોવાનું માનવામાં આવે છે. રાજ્યના ચૂંટણી પ્રચારમાં પણ કોંગ્રેસે રેવંત રેડ્ડીના ચહેરાને આગળ ધપાવ્યો હતો અને તે રાહુલ અને પ્રિયંકા ગાંધીની આસપાસ જોવા મળ્યા હતા. આ વિધાનસભા ચૂંટણીમાં તેઓ કામરેડી સીટ પરથી મુખ્યમંત્રી કે ચંદ્રશેખર રાવ સામે ચૂંટણી લડી રહ્યા છે.મુખ્યમંત્રીની રેસમાં લોકસભા સાંસદ ઉત્તર કુમાર રેડ્ડીનું નામ પણ સામેલ છે. તેઓ નાલકોંડા લોકસભા સીટના સાંસદ છે અને પૂર્વ પ્રદેશ અધ્યક્ષ પણ રહી ચૂક્યા છે. આ વખતે તેઓ હુઝુરનગર બેઠક પરથી ચૂંટણી લડી રહ્યા છે, તેઓ આ બેઠક પરથી બે વખત ધારાસભ્ય પણ રહી ચૂક્યા છે.

કેવો રહ્યો વોટશેર?

તેલંગાણામાં કોંગ્રસને 39.40 ટકા વોટ મળ્યા છે. જ્યારે ભારત રાષ્ટ્રીય સમિતિ (બીઆરએસ)ને 37.55 ટકા વોટ મળ્યા છે. બન્ને વચ્ચે વોટ શેરનો તફાવત બે ટકાથી વધારે છે. ભાજપને આ વખતે ગત વખતની સરખામણીએ ડબલ વોટ શેર મળ્યો છે. 2018માં ભાજપનો વોટ શેર 6.98 ટકા હતો, જે આ વખતે 13.90 ટકા થયો છે. એઆઈએમઆઈએમને 2.22 ટકા અને બીએસપીને 1.37 ટકા વોટ મળ્યા છે. તેલંગાણાની 119 સીટોમાંથી 64 બેઠકો પર કોંગ્રેસે વિજય મેળવ્યો છે. બીઆરએસે 39 બેઠકો પર જીત મેળવી છે. ભાજપે 8 સીટો પર જીત મેળવી છે. એઆઈએમઆઈએમ એ 7 સીટો પર જીત મેળવી છે. કોમ્યુનિષ્ટ પાર્ટી ઓફ ઇન્ડિયાએ 1 બેઠક પર જીત મેળવી છે.