ડોલરમાં ઘટાડા અને યુએસ ફેડરલ રિઝર્વ વ્યાજ દરમાં ઘટાડો કરે તેવા સંકેતોને કારણે ભારતીય બજારમાં તેજી
શેરબજાર ન્યૂઝ
શેરબજારે આજે નવો રેકોર્ડ સર્જ્યો છે. સેન્સેક્સે 72 હજારની સપાટી વટાવીને ઓલટાઇમ હાઈ થયો છે. બીજી તરફ નિફટીએ પણ 21673ની સપાટી સ્પર્શી છે. જેને કારણે આજે રોકાણકારો માલામાલ થઈ ગયા છે.
શેરબજાર દરરોજ નવા રેકોર્ડ બનાવી રહ્યું છે. વૈશ્વિક બજારના સતત હકારાત્મક પ્રતિસાદને કારણે સેન્સેક્સ અને નિફ્ટી સતત લીલા નિશાનમાં ટ્રેડ થઈ રહ્યા છે. બુધવારે બજારમાં સતત ચોથા દિવસે ઉછાળો જોવા મળ્યો હતો અને નિફ્ટી તેની સર્વકાલીન ઊંચાઈને સ્પર્શી ગયો હતો. બંને મુખ્ય સૂચકાંકોમાં સેન્સેક્સ અને નિફ્ટીમાં 1 ટકાથી વધુનો વધારો જોવા મળ્યો છે. ડિસેમ્બરમાં બન્ને 7 ટકા વધ્યા છે. અગાઉ નવેમ્બરમાં પણ બજાર 5 ટકા વધ્યું હતું. બજારમાં ઉછાળાનું કારણ અમેરિકામાં ફુગાવાના દરમાં ઘટાડા પછી વ્યાજદરમાં ઘટાડાની અપેક્ષા છે.
ડોલરના ઘટાડાને કારણે બજાર પણ મજબૂત થઈ રહ્યું છે. આજના ટ્રેડિંગ સેશન દરમિયાન સેન્સેક્સ 750 પોઈન્ટથી વધુ ઉછળી 72110 એ પહોંચ્યો હતો. તે જ સમયે, નિફ્ટી 50 ટ્રેડિંગ સેશન દરમિયાન 230 પોઇન્ટના ઉછાળા સાથે 21,673 પોઈન્ટની તેની સર્વોચ્ચ સપાટીએ પહોંચ્યો હતો. અગાઉ સેન્સેક્સે 20 ડિસેમ્બરે 71,913 પોઈન્ટની સર્વકાલીન ઉચ્ચ સપાટી બનાવી હતી. બીએસઇમાં લિસ્ટેડ કંપનીઓનું માર્કેટ કેપ વધીને રૂ. 361 લાખ કરોડ થયું છે.
અમેરિકામાં ફુગાવાનો દર ઘટી રહ્યો છે. આ પછી, માહિતી અપેક્ષિત છે કે યુએસ ફેડરલ રિઝર્વ આવતા વર્ષના માર્ચની શરૂઆતમાં વ્યાજ દરમાં ઘટાડો કરવાની જાહેરાત કરી શકે છે. આ આશા સાથે રોકાણકારો શેરબજારમાં વધુને વધુ નાણાંનું રોકાણ કરી રહ્યા છે. રોઇટર્સના અહેવાલમાં જણાવાયું છે કે ફેડ આગામી માર્ચમાં 150 બેસિસ પોઈન્ટ્સથી વધુના દરમાં ઘટાડો કરવાનું શરૂ કરી શકે છે. વ્યાજદરમાં ઘટાડો નાણાકીય વ્યવસ્થામાં નાણાં લાવશે. આનાથી કંપનીઓને વધુ નફો મેળવવામાં મદદ મળી શકે છે અને આ સેન્ટિમેન્ટ બજારને મજબૂત બનાવી રહ્યું છે.
