મોદીએ પુતિનને આપેલી સલાહ વિશ્ર્વભરમાં ચમકી
ઉઝબેકિસ્તાનના સમરકંદમાં આયોજિત એસસીઓ સંમેલન દરમિયાન, પીએમ નરેન્દ્ર મોદીની રશિયાના રાષ્ટ્રપતિ વ્લાદિમીર પુતિનને કહેલા સ્પષ્ટ શબ્દો માટે સમગ્ર વિશ્વમાં પ્રશંસા થઈ રહી છે. ન્યૂયોર્કમાં સંયુક્ત રાષ્ટ્ર મહાસભાની બેઠકમાં ફ્રાન્સ દ્વારા મોદીની ખૂબ પ્રશંસા કરવામાં આવી હતી. પીએમ મોદીએ યુક્રેન યુદ્ધ વિશે રાષ્ટ્રપતિ પુતિનને સ્પષ્ટ કહ્યું હતું કે ’આજનો યુગ યુદ્ધનો નથી.’અમેરિકન એનએસએ જેક સુલિવને પણ પીએમ મોદીના વખાણ કરતા નિવેદન જારી કર્યું છે. વૈશ્વિક મીડિયા પણ પીએમના વખાણ કરી રહ્યું છે.
વડાપ્રધાન મોદીએ 16 સપ્ટેમ્બરે સમરકંદમાં શાંઘાઈ કોઓપરેશન ઓર્ગેનાઈઝેશન સમિટની બાજુમાં યોજાયેલી બેઠકમાં આ વાત કહી હતી. મોદીએ પુતિનને યુક્રેન કટોકટીથી ઉદભવેલી ખાદ્ય સંકટ, ઈંધણ સુરક્ષા અને ખાતરની કટોકટીનો ઉકેલ લાવવાના માર્ગો શોધવા વિનંતી કરી હતી. આ સાથે તેમણે યુક્રેન સાથે રશિયાના યુદ્ધ પર ચિંતા વ્યક્ત કરી અને કહ્યું કે ’આજનો યુગ યુદ્ધનો નથી’.
ફ્રાન્સના રાષ્ટ્રપતિ ઈમેન્યુઅલ મેક્રોન અને યુએસ નેશનલ સિક્યોરિટી એડવાઈઝર જેક સુલિવાને મંગળવારે પુતિનને આપેલા શબ્દો માટે પીએમ મોદીની પ્રશંસા કરી. મેક્રોને કહ્યું- ’પીએમ નરેન્દ્ર મોદીએ સાચું કહ્યું, આ યુદ્ધનો સમય નથી. આ સમય પશ્ચિમ સામે બદલો લેવાનો નથી કે પશ્ચિમનો પૂર્વ સામે વિરોધ કરવાનો નથી. આપણા જેવા સાર્વભૌમ દેશો માટે સાથે રહેવાનો સમય આવી ગયો છે. તે આપણી સામેના પડકારોનો એકજૂથ થઈને સામનો કરવાનો છે.
બીજી બાજુ અમેરિકન એનએસએ સુલિવાને પણ વ્હાઇટ હાઉસમાં મીડિયા સાથેની ચર્ચામાં પીએમ મોદીના વખાણ કર્યા. સુલિવને કહ્યું, ’મને લાગે છે કે વડાપ્રધાન મોદીએ જે કહ્યું તે સાચું છે અને માત્ર એટલું જ કે આ યુદ્ધનો સમય નથી. અમેરિકાએ ભારતીય નેતૃત્વના આ નિવેદનનું સ્વાગત કર્યું છે. રશિયા સાથે ભારતના લાંબા સંબંધો છે, તેમ છતાં તેણે ભારપૂર્વક કહ્યું છે કે યુદ્ધ સમાપ્ત કરવાનો સમય આવી ગયો છે.
સંયુક્ત રાષ્ટ્ર મહાસભા સિવાય પીએમ મોદીની પહેલ સમગ્ર વિશ્વમાં લોકપ્રિય બની છે. આંતરરાષ્ટ્રીય મીડિયા દ્વારા પણ તેની પ્રશંસા કરવામાં આવી છે. અમેરિકન નેટવર્ક સીએનએનએ વિશ્વ રાજનીતિ પર પીએમ મોદીની પકડના વખાણ કર્યા અને કહ્યું કે પીએમ મોદીએ પુતિનને કહ્યું, હવે યુદ્ધનો સમય નથી. તે જ સમયે, ’વોશિંગ્ટન પોસ્ટ’ની હેડલાઈન હતી ’મોદીએ યુક્રેનમાં યુદ્ધ પર પુતિનને ઠપકો આપ્યો’. ધ ન્યૂ યોર્ક ટાઇમ્સે તેની હેડલાઇનમાં, “ભારતના નેતા પુતિનને કહે છે ઇટ્સ નોટ એન એજ ઓફ વોર” ધ વોશિંગ્ટન પોસ્ટ અને ધ ન્યૂ યોર્ક ટાઇમ્સ બંનેના વેબપેજ પર હેડલાઇન સમાચાર હતા.
પીએમ મોદી સાથેની મુલાકાતમાં રાષ્ટ્રપતિ પુતિને કહ્યું હતું કે તેઓ યુક્રેન સંઘર્ષ પર ભારતની સ્થિતિથી વાકેફ છે. પુતિને કહ્યું કે તેઓ યુક્રેન સંઘર્ષ પર પીએમ મોદીની ચિંતાથી વાકેફ છે. અમે ઇચ્છીએ છીએ કે આ શક્ય તેટલી વહેલી તકે સમાપ્ત થાય, પરંતુ યુક્રેનિયન નેતૃત્વ વાટાઘાટોમાં જોડાવાનો ઇનકાર કરે છે. પુતિને કહ્યું કે તે પોતાના લક્ષ્યોને હાંસલ કરવા માંગે છે
