અમેરિકાના પૂર્વ રાષ્ટ્રપતિ ડોનાલ્ડ ટ્રમ્પે ભારત વિરોધી માનસિકતાના દર્શન કરાવ્યા છે. જો કે આવું તેઓએ ત્યાંની મલ્ટીનેશનલ કંપનીઓને રાજી કરવા કહ્યું હોવાનું જણાય આવે છે. કારણકે ભારત આત્મનિર્ભર બનવા માટે બહારથી શક્ય તેટલી ઓછી આયાત થાય તેવા પ્રયાસો કરી રહ્યું છે. પરિણામે અમેરિકન કંપનીઓની પ્રોડક્ટ ભારત આવે છે તો તેના ઉપર ઘણો બોજ લાગે છે.
અમેરિકામાં રાષ્ટ્રપતિની ચૂંટણીને લઈને રાજકીય ગરમાવો તેજ થઈ ગયો છે. દરમિયાન અમેરિકાના ભૂતપૂર્વ રાષ્ટ્રપતિ ડોનાલ્ડ ટ્રમ્પે ફરી એકવાર ભારતમાં અમુક અમેરિકન ઉત્પાદનો, ખાસ કરીને હાર્લી-ડેવિડસન મોટરસાયકલ પરના ઊંચા ટેક્સનો મુદ્દો ઉઠાવ્યો છે અને જો સત્તામાં પાછા ફરશે તો દેશ પર સમાન ટેક્સ લાદવાની ધમકી આપી છે. યુએસ પ્રમુખ તરીકેના તેમના કાર્યકાળ દરમિયાન, ટ્રમ્પે ભારતને ’ટેક્સિંગ કિંગ’ તરીકે વર્ણવ્યું હતું અને મે 2019 માં જનરલાઇઝ્ડ સિસ્ટમ ઑફ પ્રેફરન્સીસને સમાપ્ત કરી દીધું હતું જેણે યુએસ માર્કેટમાં ભારતને પ્રેફરન્શિયલ ટ્રીટમેન્ટ આપી હતી.
ટ્રમ્પએ આરોપ લગાવ્યો હતો કે ભારતે અમેરિકાને તેના બજારોમાં ન્યાયપૂર્ણ અને ન્યાયી પ્રવેશ આપ્યો નથી. ’ફોક્સ બિઝનેસ ન્યૂઝ’ના લેરી કુડલોને આપેલા ઈન્ટરવ્યુમાં ટ્રમ્પે ભારતના ટેક્સ દરો પર સવાલ ઉઠાવ્યા હતા અને તેમને અત્યંત ઊંચા ગણાવ્યા હતા. ભૂતપૂર્વ રાષ્ટ્રપતિએ કહ્યું, ’બીજી વસ્તુ જે હું ઇચ્છું છું તે એક સમાન ટેક્સ છે… ભારત ઊંચા ટેક્સ વસૂલે છે. મેં આ હાર્લી-ડેવિડસન (મોટરસાયકલ) સાથે જોયું. મેં પણ કહ્યું કે ભારત સાથે તમે કેમ સબંધ રાખો છો? તેઓ 100 ટકા, 150 ટકા અને 200 ટકા ટેક્સ વસૂલે છે.
ટ્રમ્પે કહ્યું, ’મારે બસ આ જ જોઈએ છે…. જો ભારત અમારા પર ટેક્સ લગાવી રહ્યું છે તો આપણે તેના પર પણ ટેક્સ લગાવવો જોઈએ.’ તેમણે ભારતમાં તેમજ બ્રાઝિલમાં ટેક્સ સિસ્ટમ પર પ્રશ્નો ઉઠાવ્યા હતા. ટ્રમ્પે 2024માં રાષ્ટ્રપતિની ચૂંટણી લડવાની ઈચ્છા વ્યક્ત કરી છે. જોકે, તેમણે બુધવારે યોજાનારી રિપબ્લિકન પાર્ટીના રાષ્ટ્રપતિ પદના ઉમેદવારો માટેની પ્રથમ પ્રાથમિક ચર્ચામાં ભાગ લેવાનો ઇનકાર કરી દીધો છે. દરમિયાન, ટ્રમ્પે રવિવારે કહ્યું કે તેઓ બુધવારે રિપબ્લિકન રાષ્ટ્રપતિ પદના ઉમેદવારો માટેની પ્રથમ પ્રાથમિક ચર્ચામાં ભાગ લેશે નહીં.
ટ્રમ્પે પોતાની સોશિયલ મીડિયા વેબસાઈટ પર લખ્યું, ’જાહેર છે કે હું કોણ છું, મારો રાષ્ટ્રપતિ કાર્યકાળ કેટલો સફળ રહ્યો છે. તેથી જ હું દલીલ કરીશ નહીં. ભૂતપૂર્વ રાષ્ટ્રપતિના પ્રવક્તાએ હજુ સુધી સ્પષ્ટતા કરી નથી કે શું તેઓ દરેક પ્રાથમિક ચર્ચાનો બહિષ્કાર કરવાની યોજના ધરાવે છે કે પછી તેઓ આ ચર્ચાને છોડી દેશે. વિકાસની જાણકારી ધરાવતી એક વ્યક્તિએ રવિવારે કહ્યું કે ટ્રમ્પ અને તેમની ટીમે રિપબ્લિકન નેશનલ કમિટીને તેમની યોજનાઓની જાણ કરી નથી. આ દરમિયાન ટ્રમ્પના હરીફોએ ચર્ચામાં ભાગ ન લેવા બદલ તેમના પર નિશાન સાધ્યું છે.
