બ્રિટનમાં મોંઘવારીનો પ્રભાવ એટલો વધી ગયો છે કે લોકો માટે બે ટાઈમનો રોટલો જમવો પણ મુશ્કેલ બની ગયો છે. દેશના લગભગ અડધા પરિવારો તેમના દૈનિક આહારમાં ઘટાડો કરી રહ્યા છે. આ આંકડા ક્ધઝ્યુમર ગ્રુપ ’વિચ’ના સર્વેમાં સામે આવ્યા છે. યુએસ સેન્સસ બ્યુરો અનુસાર, આ વર્ષના મધ્યમાં યુકેની વસ્તી 5,59,77,178 હતી.
આ સર્વે ગ્રુપ વતી 3000 લોકો વચ્ચે કરવામાં આવ્યો છે. સર્વે રિપોર્ટ અનુસાર, આર્થિક સંકટ પહેલાની સરખામણીએ પર્યાપ્ત અને પૌષ્ટિક ખોરાક મેળવવો વધુ મુશ્કેલ બની રહ્યો છે. રિપોર્ટમાં એમ પણ કહેવામાં આવ્યું છે કે લગભગ 80 ટકા પરિવારો આર્થિક મુશ્કેલીઓનો સામનો કરી રહ્યા છે. યુકેમાં ખાદ્ય ફુગાવો સપ્ટેમ્બરમાં 10 ટકાને વટાવી ગયો છે. તે જ સમયે, રિટેલ પ્રાઇસ ઇન્ડેક્સ 12.6 ટકા પર પહોંચ્યો હતો, જે ઓગસ્ટમાં 12.3 ટકા હતો.
યુકેમાં ઉર્જાના ભાવમાં વધારાને કારણે આર્થિક કટોકટી વધુ વકરી છે. રુસ-યુક્રેન યુદ્ધના કારણે ગેસ, પેટ્રોલિયમના સપ્લાયને અસર થઈ છે. આ ઉપરાંત વીજળીના દરોમાં પણ વધારો થયો છે. ઊર્જાના ભાવમાં વધારા સાથે વિવિધ ચીજવસ્તુઓના ભાવમાં પણ નોંધપાત્ર વધારો થયો છે. અહેવાલ મુજબ, બ્રિટનમાં આર્થિક અને ઉર્જા સંકટને કારણે લાખો લોકો આ શિયાળામાં તેમના ઘરોને પૂરતું ગરમ રાખી શકશે નહીં. આ રીતે, તેઓએ ખોરાક પર કાપ મૂકવાની સાથે શિયાળાનો વધુ માર સહન કરવો પડશે.
ઉલ્લેખનીય છે કે ખાદ્ય સંકટની અસર તો વિશ્વભરમાં છે. યુનાઇટેડ નેશન્સ વર્લ્ડ ફૂડ પ્રોગ્રામ મુજબ, વિશ્વમાં 795 મિલિયન લોકો ભૂખમરોથી પીડાય છે. યુનાઈટેડ નેશન્સનો અંદાજ છે કે 2050 સુધીમાં વધારાના 200 મિલિયન લોકોને ખોરાકની અછતનો સામનો કરવો પડશે. વધુમાં, દર ત્રણમાંથી એક વ્યક્તિ કોઈને કોઈ પ્રકારનું કુપોષણથી પીડાય છે. આનો અર્થ એ છે કે તેમના આહારમાં પૂરતા પ્રમાણમાં વિટામિન્સ અને ખનિજોનો અભાવ છે, જેના કારણે બાળકોમાં વૃદ્ધિ અટકી જવા જેવી સ્વાસ્થ્ય સમસ્યાઓ થઈ શકે છે.
સંયુક્ત રાષ્ટ્રના આંકડા અનુસાર, વિશ્વના મોટાભાગના ભૂખ્યા લોકો વિકાસશીલ દેશોમાં રહે છે, જેમાં એશિયા સૌથી વધુ ભૂખમરો ધરાવતો ખંડ છે. એશિયામાં લગભગ 526 મિલિયન લોકો ભૂખથી પીડાય છે. તે જ સમયે, નબળા પોષણને કારણે દર વર્ષે 5 વર્ષથી ઓછી ઉંમરના 31 લાખ બાળકો મૃત્યુ પામે છે.
