કેનેડાએ અગાઉ ભારતીયો માટે દ્વાર બંધ કર્યા બાદ હવે આ દ્વાર ફરી ખોલવાની તૈયારીઓ શરૂ કરી દીધી છે એટલે હવે કેનેડા જવા ઇચ્છુક અનેક ભારતીયોનું સ્વપ્ન સાકાર થવાની દિશામાં છે.
કેનેડા મજૂરની તીવ્ર અછતને કારણે ઇમિગ્રેશનને સરળ બનાવવાની યોજના ધરાવે છે. દેશના ઈમિગ્રેશન મિનિસ્ટર સીન ફ્રેઝરે એક નવા પ્લાનની જાહેરાત કરી છે. તેમણે આશા વ્યક્ત કરી છે કે નવી યોજના બાદ દેશમાં વસાહતીઓની સંખ્યામાં ધરખમ વધારો થશે અને મજૂરોની અછત દૂર થશે. એવું માનવામાં આવે છે કે સરકારની આ જાહેરાતથી ભારતીયોને મોટા પાયે ફાયદો થશે. કેનેડા એવો દેશ છે જ્યાં સૌથી વધુ સંખ્યામાં બિનનિવાસી ભારતીયો છે.
સીન ફ્રેઝરે કહ્યું, ’કેનેડાના લોકોએ એ સમજવાની જરૂર છે કે તેમને વસ્તી વધારવાની જરૂર છે જેથી શ્રમબળની સમસ્યાનો ઉકેલ લાવી શકાય.’ ફ્રેઝરે કહ્યું કે આશા છે કે આ નવા પગલા બાદ પરપ્રાંતિય મજૂરોની સંખ્યામાં વધારો થશે. વર્ષ 2014માં 4 લાખ 31 હજાર પ્રવાસી મજૂરો કેનેડા પહોંચ્યા હતા. વર્ષ 2025 સુધીમાં તેમની સંખ્યા વધારીને પાંચ લાખ કરવાની યોજના છે. આનાથી સ્પષ્ટ છે કે દેશમાં રહેતા પરપ્રાંતિય મજૂરોની સંખ્યા ઝડપથી વધશે. ફ્રેઝરે માહિતી આપી હતી કે કેનેડાએ વર્ષ 2025 સુધીમાં ઇકોનોમિક માઇગ્રન્ટ કેટેગરીમાં ઇમિગ્રન્ટ્સની સંખ્યા વધારીને 60 ટકા કરવાનું લક્ષ્ય રાખ્યું છે.
કેનેડા સરકારનો આ નિર્ણય ભારતીયો માટે ફાયદાકારક સાબિત થઈ શકે છે. સ્ટેટિસ્ટિક્સ કેનેડાના રિપોર્ટ અનુસાર, 2016 થી 2021 દરમિયાન કેનેડા આવેલા ઇમિગ્રન્ટ્સમાં 18.6% ભારતીય હતા. આ દરમિયાન 2.46 લાખ ભારતીયો કેનેડા પહોંચ્યા, જેમાંથી 1.28 લાખ પુરૂષ અને 1.18 લાખ મહિલાઓ હતા. ભારતીયો ઉપરાંત આફ્રિકા અને ફિલિપિનોના લોકો પણ કેનેડા પહોંચ્યા હતા.
26 ઓક્ટોબરે આવેલા ડેટામાં જણાવવામાં આવ્યું છે કે છેલ્લા પાંચ વર્ષમાં દેશની વસ્તીમાં 5.3%નો વધારો થયો છે. આ પછી વસ્તી 37 મિલિયન થઈ ગઈ છે. ઓન્ટારિયો ભારતીયો માટે પ્રિય સ્થળ છે. 55% એનઆરઆઈ ટોરોન્ટો, ઓટાવા, વોટરલૂ, બ્રેમ્પટન અને અન્ય શહેરોમાં રહે છે.
ઉલ્લેખનીય છે કે કેનેડાને બીજુ પંજાબ પણ ગણવામાં આવે છે. કારણકે પંજાબમાં કેનેડા જવાનો મોટો ક્રેઝ છે. પંજાબના લોકોની ત્યાં મોટાપ્રમાણમાં વસ્તી છે.
