હવામાન સમાચાર
તાપમાન અને વાતાવરણ આગામી પાંચ દિવસ યથાવત
24 કલાક બાદ તાપમાનમાં બે ડિગ્રી જેટલો વધારો નોંધાઇ શકે છે.
ગુજરાતમાં હાલ ઉત્તર પશ્ચિમ ઉતરના પવન ફૂંકાઇ રહ્યા છે. રાજ્યનું તાપમાન અને વાતાવરણ આગામી પાંચ દિવસ યથાવત રહેશે. લઘુતમ તાપમાન સામાન્ય કરતા 5 ડિગ્રી ઊંચું છે. જેના કારણે બેવડી ઋતુનો અહેસાસ થઇ રહ્યો છે. રાજ્યમાં ઠંડીથી આંશિક રાહત મળશે. 24 કલાક બાદ તાપમાનમાં બે ડિગ્રી જેટલો વધારો નોંધાઇ શકે છે. જેનો અર્થ એ થાય કે, આજથી જ તાપમાનમાં વધારો અનુભવાઇ શકે છે. લઘુત્તમ તાપમાનમાં મોટો ફેરફાર નહીં થાય પરંતુ કેટલાક વિસ્તારોમાં એકથી બે ડિગ્રી તાપમાન વધી શકે છે.
વેસ્ટર્ન ડિસ્ટ્રબન્સ સક્રિય થતાં તાપમાન ઉંચકાઇ રહ્યુ છે. આ સાથે હવામાનમાં ભેજ આવી રહ્યો છે જેથી તાપમાન વધશે. આ સાથે તેમણે રાજ્યમાં મંગળવારના તાપમાન અંગેની વાત કરતા જણાવ્યુ કે, 13.4 ડિગ્રી તાપમાન સાથે ગાંધીનગર રાજ્યનું સૌથી ઠંડુ શહેર રહ્યુ છે. આ સાથે અમદાવાદમાં તાપમાન 14.7 ડિગ્રી નોંધાયુ છે. તો બીજી બાજુ હવામાન નિષ્ણાત પરેશ ગોસ્વામીએ હવામાન અંગેની આગાહી કરતા જણાવ્યુ કે, 31 જાન્યુઆરી અને 1 ફેબ્રુઆરીના દિવસે ઝાકળવર્ષાની સંભાવના છે. જેમાં 30મી જાન્યુઆરીએ રાજ્યના ઘણાં ભાગોમાં સવારે ઝાકળવર્ષા જેવો માહોલ તથા લો-વિઝિબ્લિટી જોવા મળી હતી. જેમાં કેટલીક જગ્યાએ ઘાટું ઝાકળ પણ જોવા મળ્યું હતું. જાણે રાત્રે વરસાદી ઝાપટું પડી ગયું હોય તેવી ઝાકળ પણ ઘણાં વિસ્તારોમાં જોવા મળી છે. જેમાં સૌરાષ્ટ્ર-કચ્છ અને ઉત્તર ગુજરાતમાં ઘાટું ઝાકળવાળું વાતાવારણ જોવા મળ્યું હતું.
આગામી પાંચમી ફેબ્રુઆરી સુધી હાલ પ્રમાણેનું તાપમાન ઊંચું રહેવાની સંભાવના છે. જોકે, આ પછી સામાન્ય ઠંડીનો રાઉન્ડ આવી શકે છે. આ સાથે હાલ રાજ્યમાં ઘણાં ભાગોમાં વાદળછાયું વાતાવરણ છે અને માવઠા જેવો માહોલ ઉભો થયો છે. જોકે, હાલ અમારા તરફથી કોઈ માવઠાની આગાહી નથી. જેથી ખેડૂતોએ તેનાથી ગભરાવાની જરુર નથી.
