પીએમ મોદી માટે નવું આવાસ બનાવવાનું કામ ઓગષ્ટ મહિનાથી શરુ થઈ જાય તેવી શક્યતા છે. આમ તો આ પ્રોજેક્ટ વહેલો શરુ થવાનો હતો, પરંતુ કોરોનાની બીજી લહેરને કારણે તેમાં મોડું થયું છે. તેના માસ્ટર પ્લાન અનુસાર, નવું પીએમ આવાસ 15 એકરમાં ફેલાયેલું હશે, અને તેમાં 10 લો રાઈઝ બિલ્ડિંગ હશે. કોઈપણ બિલ્ડિંગમાં બેથી વધુ માળ નહીં હોય. CPWDની દરખાસ્ત અનુસાર, પ્રાઈમ મિનિસ્ટર્સ રેસિડેન્સ (PMR)માં કોઈ ભોયરું પણ નહીં હોય.
સૂત્રોનું માનીએ તો નવા PMRમાં પીએમના નિવાસની સાથે તેમની ઓફિસ પણ હશે. આમ, હવે પીએમઓ અને PMR સાઉથ બ્લોકમાં એકબીજાથી નજીક આવી જશે. પ્લાન અનુસાર, PMRમાં 112 વાહનો પાર્ક થઈ શકશે, અને 1000 કર્મચારીઓ કામ કરી શકે તેવી સવલત હશે. તેમાં રોજના 500 લોકોની અવરજવર રહેશે. પીએમની સુરક્ષા માટે એસપીજી બિલ્ડિંગ પણ આ જ કોમ્પ્લેક્સમાં અઢી એકરના પ્લોટમાં બનાવાશે.
CPWDએ PMR બનાવવામાં કેટલો ખર્ચ થશે તેની કોઈ વિગતો જાહેર નથી કરી. જોકે, સેન્ટ્રલ વિસ્ટાના રિડેવલપમેન્ટનો કુલ પ્રોજેક્ટ 13,400 કરોડ રુપિયાનો થાય છે. જેમાં પાર્લામેન્ટ અને રાજપથના રિડેવલપમેન્ટનો સમાવેશ નથી થતો. CPWDએ આ વર્ષે જાન્યુઆરીમાં જે દરખાસ્ત મૂકી હતી તે અનુસાર પીએમના નવા ઘરનું બાંધકામ ડિસેમ્બર 2021 સુધીમાં પૂરું થઈ જવાનું હતું. જોકે, કોરોનાને કારણે તેમાં મોડું થયું છે.
એક સૂત્રના જણાવ્યા અનુસાર, એપ્રિલ-મે સુધીમાં આફ્રિકા એવન્યૂ અને કેજી માર્ગ પર બે નવી બિલ્ડિંગ બનાવીને તેમાં ઓફિસ શિફ્ટ કર્યા બાદ PMRનું બાંધકામ શરુ કરવાનું હતું. જોકે, તેમાં મોડું થયું છે. હવે ઓફિસ શિફ્ટ કરવાનું કામ ઓગષ્ટ મહિનામાં શરુ થઈ જશે, અને તે દરમિયાન જ PMR અને SPG બિલ્ડિંગ માટે ટેન્ડર બહાર પાડવામાં આવશે.
નવું PMR સેન્ટ્રલ વિસ્ટા પ્રોજેક્ટનો એક ભાગ છે, જે હાલ સેન્ટ્રલ દિલ્હીમાં આકાર લઈ રહ્યો છે. જેમાં IGNCA પ્લોટ પર બનનારી ત્રણ ઓફિસનું ટેન્ડર બહાર પડી પણ ગયું છે. આ બિલ્ડિંગ્સ સેન્ટ્રલ એસી, આઈટી બેઝ્ડ બિલ્ડિંગ મેનેજમેન્ટ તેમજ બેઝમેન્ટ પાર્કિંગ સિસ્ટમ ઉપરાંત કેમ્પસમાં જ ટોટલ મેનેજમેન્ટ ઓફ સોલિડ એન્ડ લિક્વિડ વેસ્ટને મેનેજ કરી શકાશે. દરેક બિલ્ડિંગમાં 40-45 લોકો બેસી શકે તેવા વિશાળ કોન્ફરન્સ રુમ ઉપરાંત લાઈબ્રેરી, ફાર્મસી, ઘોડિયાઘર અને મ્યૂઝીક રુમ ઉપરાંત જિમ તેમજ યોગા સેન્ટર પણ હશે.
સમગ્ર પ્લાન અનુસાર, PMR, VP એન્ક્લેવ અને મેગા કોન્ફરન્સ રુમના બાંધકામમાં હાલ આ જગ્યાએ રહેલા 4,642 ઝાડની સંખ્યા ઘટીને 3,165 રહી જશે. જોકે, CPWD તેના બદલામાં શહેરના અન્ય વિસ્તારોમાં 30,347 વૃક્ષો વાવશે.
