- કોઈ વ્યક્તિના મૃત્યુ બાદ તેના વારસદારને માત્ર 45 ટકા મિલકત મળે છે, બાકીની 55 ટકા મિલકત સરકારમાં જમા થાય છે, વિદેશનો આ કાયદા વિશે ભારતે પણ ચર્ચા કરવાની જરૂર : આવા નિવેદન બાદ ભાજપે વિરોધ નોંધાવતા કોંગ્રેસે પણ નિવેદનથી અંતર રાખ્યું
ઈન્ડિયન ઓવરસીઝ કોંગ્રેસના પ્રમુખ સામ પિત્રોડાએ વારસાગત મિલકત પરના ટેક્સને લઈને મોટું નિવેદન આપ્યું છે. સામ પિત્રોડાએ કહ્યું છે કે અમેરિકામાં જો કોઈની પાસે 100 મિલિયન ડોલરની પ્રોપર્ટી હોય અને તે મૃત્યુ પામે તો તેના બાળકોને આખી પ્રોપર્ટી મળતી નથી. બાળકોને માત્ર 45 ટકા મિલકત મળે છે. બાકીની 55 ટકા મિલકત પર સરકારનું નિયંત્રણ છે. આ નિવેદન બાદ રાજકીય વિવાદ શરૂ થઈ ગયો છે જો કે કોંગ્રેસે પણ આ નિવેદનથી દુરી બનાવી લીધી છે.
સામ પિત્રોડાએ કહ્યું હતું કે અમેરિકામાં વારસાગત ટેક્સ છે. જો કોઈની પાસે 100 મિલિયન ડોલરની સંપત્તિ છે અને જ્યારે તે મૃત્યુ પામે છે ત્યારે તે ફક્ત 45 ટકા તેના બાળકોને ટ્રાન્સફર કરી શકે છે, સરકાર 55 ટકા સંપત્તિ લઇ લે છે. આ એક રસપ્રદ કાયદો છે. તે કહે છે કે તમે તમારી પેઢીમાં સંપત્તિ બનાવી અને હવે તમે જતા રહ્યા છો, તમારે તમારી સંપત્તિ જનતા માટે છોડી દેવી જોઈએ, બધી નહીં પરંતુ અડધી જે મને યોગ્ય લાગે છે
તેમણે આગળ કહ્યું હતું કે ભારતમાં તમારી પાસે તે નથી. જો કોઈની સંપત્તિ 10 અબજ રૂપિયા છે અને તે મૃત્યુ પામે છે, તો તેના બાળકોને 10 અબજ રૂપિયા મળે છે અને જનતાને કશું મળતું નથી. તેથી આ એવા મુદ્દા છે જેના પર લોકોએ ચર્ચા કરવી પડશે. મને ખબર નથી કે પરિણામ શું આવશે પરંતુ જ્યારે આપણે સંપત્તિના પુન:વિતરણની વાત કરીએ છીએ ત્યારે આપણે નવી નીતિઓ અને નવા કાર્યક્રમો વિશે વાત કરીએ છીએ જે લોકોના હિતમાં છે અને માત્ર અતિ સમૃદ્ધ લોકોના હિતમાં નથી.
વધુમાં તેણે તેમના સોશિયલ મીડિયા પ્લેટફોર્મ એક્સ પર લખ્યું હતું કે મે ટીવી પર પોતાની સામાન્ય વાતચીતમાં ફક્ત એક ઉદાહરણ તરીકે અમેરિકામાં વારસાગત ટેક્સનો ઉલ્લેખ કર્યો હતો. શું હું તથ્યોનો ઉલ્લેખ ના કરી શકું.? મેં કહ્યું કે આ એવા મુદ્દા છે જેના પર લોકોએ ચર્ચા કરવી પડશે. આને કોંગ્રેસ સહિત કોઈપણ પક્ષની નીતિ સાથે કોઈ લેવાદેવા નથી. કોણે કહ્યું કે 55 ટકા છીનવી લેવામાં આવશે? કોણે કહ્યું કે ભારતમાં આવું કંઈક થવું જોઈએ? ભાજપ અને મીડિયા કેમ ગભરાયેલ છે?
બીજેપી નેતા અમિત માલવિયાએ પ્રહાર કરતા કહ્યું કે, કોંગ્રેસે ભારતને બરબાદ કરવાનો નિર્ણય લીધો છે. હવે, પિત્રોડા સંપત્તિના પુન:વિતરણ માટે 50 ટકા વારસાગત કરની હિમાયત કરે છે. આનો અર્થ એ છે કે અમે અમારી બધી મહેનત અને એન્ટરપ્રાઇઝથી જે બનાવીએ છીએ તેમાંથી 50 ટકા છીનવી લેવામાં આવશે. આ સિવાય અમે જે પણ ટેક્સ ચૂકવીએ છીએ તે પણ જો કોંગ્રેસ જીતશે તો વધશે.
પિત્રોડાના નિવેદન પર ટિપ્પણી કરવાનો ઇનકાર કરતા કોંગ્રેસના નેતા જયરામ રમેશે કહ્યું, પિત્રોડા મારા સહિત વિશ્વભરના ઘણા લોકોના ગુરુ, મિત્ર, ફિલોસોફર અને માર્ગદર્શક રહ્યા છે. તેમણે ભારતના વિકાસમાં અસંખ્ય, કાયમી યોગદાન આપ્યું છે. તેઓ ઈન્ડિયન ઓવરસીઝ કોંગ્રેસના પ્રમુખ છે. પિત્રોડા ખુલ્લેઆમ એવા મુદ્દાઓ પર તેમના મંતવ્યો વ્યક્ત કરે છે જેના વિશે તેઓ ભારપૂર્વક અનુભવે છે. ચોક્કસપણે લોકશાહીમાં વ્યક્તિ તેના અંગત વિચારોની ચર્ચા કરવા, વ્યક્ત કરવા અને ચર્ચા કરવા માટે સ્વતંત્ર છે. આનો અર્થ એ નથી કે પિત્રોડાના વિચારો હંમેશા ભારતીય રાષ્ટ્રીય કોંગ્રેસની સ્થિતિ દર્શાવે છે.
