હાલ સમગ્ર વિશ્વ કોરોના મહામારીનો સામનો કરી રહ્યું છે. બધા દેશના વૈજ્ઞાનિકો તથા ડોક્ટરો પોતાના બનતા પ્રયત્નોથી આ રોગને નાબૂદ કરવા માટે દવાઓ શોધી રહ્યા છે. અત્યારે કોરોનાના કેસોમાં ભારતવાસીઓને થોડી રાહત મળી છે પરંતુ આપણે જાણીએ જ છીએ કે એકાદ મહિના પહેલા ભારતમાં તથા વિશ્વમાં લોકોને ઑક્સીજનની કેટલી અછત સર્જાણી હતી. આવી પરિસ્થિતમાં પશ્ચિમ રેલ્વેએ શ્રેષ્ઠ કામગીરી કરીને સમગ્ર રેલ્વેનું નામ રોશન કરી દીધું હતું. પશ્ચિમ રેલવેના રાજકોટ ડિવિઝનના હાપા સ્ટેશનથી દેશભરમાં લિક્વિડ મેડિકલ ઓક્સિજન (LMO) દ્વારા વિવિધ રાજ્યોમાં ઓક્સિજન ટ્રેનો ચલાવવામાં આવી હતી.રાજકોટ ડિવિઝનના હાપા અને કાનાલુસ સ્ટેશન થી 43 ઓક્સિજન એક્સપ્રેસ દ્વારા અત્યાર સુધીમાં દેશના જરૂરિયાતમંદ રાજ્યોમાં કુલ 4281.72 ટન લીકવીડ મેડિકલ ઓક્સિજન નું પરિવહન કરવામાં આવ્યું છે. ઑક્સીજનની કામગીરી જે કરવામાં આવી તે અંગે રેલવે કર્મચારીઓએ તેમના યાદગાર અનુભવો વિશે વાત કરી છે જે નીચે મુજબ છે
જામનગરના ટ્રાફિક ઇન્સ્પેક્ટર વિષ્ણુ કુમાર શર્મા
જામનગરમાં ટ્રાફિક ઇન્સ્પેક્ટર તરીકે તૈનાત વિષ્ણુ કુમાર શર્માએ જણાવ્યું હતું કે, કોરોના સમયગાળા દરમિયાન કટોકટીના સમયે ઓક્સિજન એક્સપ્રેસ ચલાવવામાં સામેલ કોઈપણ સ્ટાફને જ્યારે પણ ફરજ પર હોય ત્યારે તમામ રેલવે કર્મચારીઓનો સંપૂર્ણ ટેકો મળી રહ્યો છે અને બધો જ સ્ટાફ ટીમની જેમ ખંતપૂર્વક કામ કર્યું છે. મોડી રાત્રે પણ જો કોઈ ટેકનિકલ સમસ્યા કે મુશ્કેલી હોય તો ડિવિઝનના અધિકારીઓ દ્વારા સંપૂર્ણ માર્ગદર્શન અને સહકાર આપવામાં આવ્યો છે. ટૂંકમાં કહીએ તો બધાના સહિયારા પ્રયત્નો દ્વારા જ આ મુશ્કેલીમાથી આપણે બહાર આવી શક્યા.
હાપા સ્ટેશનના મેનેજર અજય પાલધીકર
હાપા સ્ટેશનના સ્ટેશન મેનેજર અજય પાલધીકરે જણાવ્યું હતું કે, હાલમાં રેલવે દ્વારા અન્ય પેસેન્જર અને ગુડ્સ ટ્રેનો સાથે ઓક્સિજન એક્સપ્રેસ ચલાવવામાં આવી રહી છે. તેઓ હંમેશાં ખાતરી કરે છે કે સંબંધિત સ્ટાફ દ્વારા ઓક્સિજન એક્સપ્રેસ ટ્રેનનું લોડિંગ અને અનલોડિંગ સમયસર પૂર્ણ થાય છે. તેમની હાજરીમાં ઓક્સિજન એક્સપ્રેસ ટ્રેનનું સંચાલન સમયસર થાય અને ટ્રેન કોઈ પણ વિલંબ વિના તેની મંઝિલ સુધી પહોંચે તે સુનિશ્ચિત કરવાનું છે.
હાપાના કોમર્શિયલ ઇન્સ્પેક્ટર પૂજા ડાંગર
હાપામાં કોમર્શિયલ ઇન્સ્પેક્ટર તરીકે ફરજ બજાવતા કુમારી પૂજા ડાંગરે જણાવ્યું હતું કે, જ્યારે પણ હાપા ગુડ્સ શૅડમાંથી ઓક્સિજન એક્સપ્રેસ ચલાવવામાં આવે છે, ત્યારે તેઓ ગુડ્સ શેડમાં હાજર રહે છે અને વાણિજ્ય વિભાગ સાથે સંબંધિત કાર્યો જેવા કે કોમર્શિયલ પ્લેસમેન્ટ, રિલીઝ, રેલવે રસીદો જનરેટ કરવા વગેરે ની ખાતરી કરે છે. તેમને આ ચોવીસ કલાક ચાલતા કામમાં વાણિજ્ય વિભાગના અધિકારીઓ અને હાપા ગુડ્સ શેડના સ્ટાફનો સંપૂર્ણ ટેકો મળી રહ્યો છે. રેલવે ઓક્સિજન એક્સપ્રેસમાં જતા ટ્રક ડ્રાઇવરો અને જીઆરપી એસ્કોર્ટિંગ સ્ટાફ માટે ખોરાક પણ પ્રદાન કરી રહી છે. આવશ્યકતા મુજબ, તે રાજ્ય સરકારના વિવિધ અધિકારીઓ સાથે વાતચીત કરે છે અને ખાતરી કરે છે કે કોઈ પણ સંજોગોમાં ઓક્સિજન એક્સપ્રેસ રવાના થવામાં વિલંબ ન થાય. દેશહિતમાં ઓક્સિજન પ્રદાન કરવા માટે રેલવેના આ મિશનમાં ભાગ લેતા તેઓ ખૂબ ગર્વ અને ખુશી અનુભવે છે.
સિનિયર સેક્શન એન્જિનિયર આર એસ ચંદેલ
કેરેજ અને વેગન ડેપો હાપામાં યાંત્રિક વિભાગમાં કાર્યરત સિનિયર સેક્શન એન્જિનિયર આર એસ ચંદેલએ જણાવ્યું હતું કે ઓક્સિજન એક્સપ્રેસનું સરળ પરિવહન તેમની પ્રાથમિકતા છે. હાપા નો સ્ટાફ ચોવીસ કલાક મેન્ટનેન્સ માટે તૈયાર રહે છે. તેઓ અને તેમના સાથી સ્ટાફ, જેમ કે હેલ્પર અને ટેકનિશિયન ને ઓક્સિજન એક્સપ્રેસના ટેન્કરમાં માપ, પેકિંગ અને લેસિંગ નું કાર્ય યોગ્ય રીતે કરતા હંમેશા એવી જ લાગણી હોય છે કે તેઓ રેલવે દ્વારા કરવામાં આવી રહેલ આ માનવ સેવાના કામમાં કોઈ ઉણપ રાખવા માંગતા નથી.
