દેશભરમાં ઘર-ઘર સુધી નામના ધરાવતી અમૂલ ટૂંક સમયમાં સામાન્ય કરતાં પાંચ ગણા વધુ પ્રોટીન સાથે સુપર મિલ્ક લોન્ચ કરવાની તૈયારી કરી રહ્યું છે.
ગુજરાત કોઓપરેટિવ મિલ્ક માર્કેટિંગ ફેડરેશન લિમિટેડના મેનેજિંગ ડિરેક્ટર ઈનચાર્જ જયેન મહેતાએ જણાવ્યું કે અમે ટૂંક સમયમાં હાઇ-પ્રોટીન તાજું દૂધ અને દહીં લોન્ચ કરીશું. આ સુપર મિલ્કના 200 મિલી પાઉચમાં 30 ગ્રામ પ્રોટીન હશે. હાલમાં બજારમાં વેચાતા 200 મિલી દૂધમાં માત્ર 6 ગ્રામ પ્રોટીન હોય છે. પ્રોટીનનું સ્તર પાંચ ગણું વધારવામાં આવશે.
હાલમાં બજારમાં વેચાતા 200 મિલી દૂધમાં માત્ર 6 ગ્રામ પ્રોટીન હોય છે, પણ સુપર મિલ્કમાં 30 ગ્રામ પ્રોટીન હશે
મહેતાએ જણાવ્યું હતું કે, આ દૂધ પીઈટી બોટલ અથવા કાર્ટનના સ્વરૂપમાં લોન્ચ કરવામાં આવશે અને અમૂલના ઈ-કોમર્સ પોર્ટલ દ્વારા જ ઉપલબ્ધ કરાવવામાં આવશે. તેમણે કહ્યું કે, અમૂલ પ્રોડક્ટ્સ અમદાવાદ, ચંદીગઢ, મુંબઈ, પુણે, બેંગલુરુ, કોલકાતા અને દિલ્હીમાં ઈ-કોમર્સ ડિલિવરી દ્વારા સીધા ગ્રાહકો સુધી પહોંચી રહી છે.
અગાઉ, ધ ઇન્ડસ આંત્રપ્રિન્યોર્સ અમદાવાદની ફ્લેગશિપ વાર્ષિક કોન્ફરન્સને સંબોધતા મહેતાએ જણાવ્યું હતું કે, આપણે બધાને દરરોજ આપણા શરીરના વજનના કિલોગ્રામ દીઠ 1 ગ્રામ પ્રોટીનની જરૂર હોય છે. જો આપણે શાકાહારી હોઈએ, તો આપણા સ્ત્રોતો મર્યાદિત છે અને આપણા શરીરને જરૂરી પ્રોટીન મેળવવું મુશ્કેલ છે.
અમૂલે પહેલેથી જ હાઈ-પ્રોટીન લસ્સી, મિલ્કશેક અને છાશ લોન્ચ કરી છે, જે તે તેના ઈ-કોમર્સ પ્લેટફોર્મ દ્વારા ગ્રાહકોને સીધું વેચે છે.જો કે, આ ઉત્પાદનોમાં 15-20 ગ્રામ પ્રોટીન હોય છે. દૂધ સહકારી છાશ પ્રોટીન પણ વેચે છે, જેની કિંમત 960 ગ્રામ માટે રૂ. 2,000 છે.
