લ્યો કરો વાત… ભારતમાં મને ચૂપ કરી દેવાય છે, એટલે વિદેશથી બોલવું પડે છે : રાહુલ ગાંધી

ઘણી વખત સંસદમાં મારા માઈક બંધ કરી દેવાયા હતા, સંસદમાં અમને કોઈ પણ પ્રકારની ચર્ચા કરવા દેવામાં આવતી નથી : રાહુલબાબાએ ભાજપ ઉપર તિર છોડ્યા

લંડનમાં રાહુલ ગાંધીએ ભાજપ સરકાર ઉપર અનેક આક્ષેપો સાથે એવો દાવો કર્યો કે ભારતમાં અમને ચૂપ કરી દેવામાં આવે છે એટલે અમારે વિદેશમાં બોલવું પડે છે. જો કે આ નિવેદન બાદ અનેક ભાજપના નેતાઓએ રાહુલ ગાંધીનો ઉધડો પણ લીધો છે.

કેરળના વાયનાડના સાંસદ રાહુલે કહ્યું, અમારા માઈક્સ ખરાબ થતા નથી, તે કામ કરે છે, પરંતુ તમે તેને ચાલુ કરી શકતા નથી.  જ્યારે હું બોલું છું ત્યારે મારી સાથે આવું ઘણી વખત બન્યું છે.  “અમને નોટબંધી અંગે ચર્ચા કરવાની મંજૂરી આપવામાં આવી ન હતી જે એક વિનાશક નાણાકીય નિર્ણય હતો. અમને જીએસટી પર ચર્ચા કરવા દેવામાં આવી ન હતી.  ચીની સૈનિકો અમારા વિસ્તારમાં ઘૂસ્યા છે, પરંતુ અમને તેની પર ચર્ચા કરવાની મંજૂરી નથી.  તેમણે કહ્યું, મને એક સંસદ યાદ છે જ્યાં જીવંત ચર્ચાઓ, ગરમ ચર્ચાઓ, દલીલો અને મતભેદો હતા, પરંતુ અમે ચર્ચા કરી.  હવે આપણે આ સંસદમાં તેવું  જોતા નથી.

રાહુલ ગાંધીએ કહ્યું કે ભારતમાં લોકતાંત્રિક પ્રક્રિયાની પ્રકૃતિ સંપૂર્ણપણે બદલાઈ ગઈ છે અને તેનું કારણ એ છે કે આરએસએસ નામના સંગઠને, જે એક કટ્ટરવાદી, ફાસીવાદી સંગઠન છે, તેણે મૂળભૂત રીતે ભારતની તમામ સંસ્થાઓ પર કબજો કરી લીધો છે.  તેમણે કહ્યું કે મને આશ્ચર્ય થયું કે તેઓ આપણા દેશની વિવિધ સંસ્થાઓને પકડવામાં કેટલા સફળ રહ્યા છે.  પ્રેસ, ન્યાયતંત્ર, સંસદ અને ચૂંટણી પંચ બધા એક યા બીજી રીતે જોખમમાં છે અને નિયંત્રિત છે.

તેમણે કહ્યું કે ભારતમાં તમે જોઈ શકો છો કે દલિતો, આદિવાસીઓ અને લઘુમતીઓ માટે શું કરવામાં આવી રહ્યું છે.  એવું નથી કે આ કોંગ્રેસ આવું કહી રહી છે.  ભારતીય લોકશાહીમાં ગંભીર સમસ્યા છે એવા લેખો સતત વિદેશી મીડિયામાં આવતા રહે છે.  તમે કોઈપણ વિપક્ષી નેતાને પૂછી શકો છો કે એજન્સીઓનો ઉપયોગ કેવી રીતે થાય છે.  મારી પાસે મારા ફોન પર પેગાસસ હતું, જે અમે સત્તામાં હતા ત્યારે થઈ રહ્યું ન હતું.

રાહુલે કહ્યું કે  ચીન અમારા 2,000 ચોરસ કિલોમીટર વિસ્તાર પર કબજો કરીને બેઠુ છે.  આપણા વડાપ્રધાને વિપક્ષી નેતાઓ સાથેની બેઠકમાં કહ્યું કે ભારતની એક ઇંચ પણ જમીન લીધી નથી.  સેના જાણે છે પણ આપણા પીએમ કહે છે કે તેઓ ત્યાં નથી.  તે તે ચીનને પ્રોત્સાહિત કરે છે.

રાહુલ ગાંધી, દેશ સાથે દગો ન કરો : અનુરાગ ઠાકુર

ભારતમાં ‘અદૃશ્ય થઈ રહેલી’ લોકશાહી અંગે યુએસ અને યુરોપીયન દેશો પાસેથી હસ્તક્ષેપની માંગ કરતા કોંગ્રેસના પૂર્વ અધ્યક્ષના નિવેદન પર વળતો પ્રહાર કરતા કેન્દ્રીય મંત્રી અનુરાગ ઠાકુરે કહ્યું, રાહુલ ગાંધી, દેશ સાથે દગો ન કરો.  તેમણે કહ્યું કે કોંગ્રેસ પાર્ટીએ અગાઉ પણ આવું કર્યું હતું જ્યારે તે સ્થાનિક મુદ્દાઓને સંયુક્ત રાષ્ટ્રમાં લઈ ગઈ હતી અને હવે તે અન્ય દેશોને ભારતમાં હસ્તક્ષેપ કરવા માટે કહી રહી છે.કોંગ્રેસના નેતાઓ હજુ ગુલામીની વિચારસરણીમાંથી બહાર આવી શક્યા નથી.

દેશની વિદેશ નીતિ સામે તેમનો વાંધો એ મુદ્દા પર તેમની સમજણના અભાવનો પુરાવો છે.  તમે વિદેશમાંથી ભારત વિશે ફેલાવેલા જૂઠાણાં પર કોઈ વિશ્વાસ કરશે નહીં.  તેમણે કહ્યું કે રાહુલ ગાંધીએ પોતાની નિષ્ફળતાઓ છુપાવવાના ષડયંત્રના ભાગરૂપે વિદેશી ધરતી પરથી ભારતને બદનામ કરવાનો આશરો લીધો છે.  રાહુલ ગાંધી વિવાદોનું તોફાન બની ગયા છે.