સૈન્ય સાશનના વિરોધમાં આયોજિત એક કાર્યક્રમમાં સેનાના હેલિકોપ્ટર વડે હવાઈ હુમલો, વિશ્વભરમાં સૈન્ય કાર્યવાહીની ટીકા
મ્યાનમારની સેનાએ મંગળવારે સૈન્ય શાસન વિરુદ્ધ એક કાર્યક્રમ માટે એકઠા થયેલા નાગરિકોની ભીડ પર હવાઈ હુમલો કર્યો હતો. રિપોર્ટ્સ અનુસાર આ હુમલામાં બાળકો સહિત ડઝનબંધ લોકો માર્યા ગયા છે. તે જ સમયે, કેટલાક મીડિયા અહેવાલોમાં, 100 થી વધુ લોકો માર્યા ગયાની આશંકા વ્યક્ત કરવામાં આવી છે.
આ કાર્યક્રમનું આયોજન લશ્કરી શાસનના વિરોધીઓ દ્વારા કરવામાં આવ્યું હોવાનું કહેવાય છે અને તેમાં સામાન્ય લોકો પણ હાજર હતા. મ્યાનમારની સેનાએ એક ગામ પર હવાઈ હુમલાની પુષ્ટિ કરી છે, જેમાં 100થી વધુ લોકો માર્યા ગયા છે. સંયુક્ત રાષ્ટ્રએ નાગરિકો પર મ્યાનમારના લશ્કરી હવાઈ હુમલાની નિંદા કરી છે.
યુનાઈટેડ નેશન્સ હાઈ કમિશનર ફોર હ્યુમન રાઈટ્સ વોલ્કર તુર્કે એક નિવેદન જારી કરીને કહ્યું છે કે હવાઈ હુમલાના અહેવાલો ખૂબ જ ચિંતાજનક છે. તેમણે જણાવ્યું હતું કે પીડિતોમાં કાર્યક્રમમાં નૃત્ય કરતા શાળાના બાળકો અને ઉદ્ઘાટન સમારોહમાં હાજર રહેલા અન્ય નાગરિકો સામેલ હોવાનું જણાયું હતું, જેના પર લશ્કરી હેલિકોપ્ટર દ્વારા બોમ્બમારો કરવામાં આવ્યો હતો.
મૃતકોમાં લશ્કરી શાસન વિરોધી સશસ્ત્ર જૂથોના નેતાઓ પણ સામેલ હોવાનો દાવો
સ્થાનિકોએ મીડિયાને જણાવ્યું કે, હવાઈ હુમલામાં લશ્કરી શાસન વિરોધી જૂથ નેશનલ યુનિટી ગવર્નમેન્ટ (એનયુજી) ની ઓફિસ નષ્ટ થઈ ગઈ. તેમણે કહ્યું કે બોમ્બ વિસ્ફોટ સમયે મહિલાઓ અને બાળકો સહિત 150 થી વધુ લોકો સમારોહમાં ભાગ લઈ રહ્યા હતા. તેમણે કહ્યું કે મૃતકોમાં સશસ્ત્ર જૂથોના નેતાઓ અને લશ્કરી શાસનનો વિરોધ કરતા અન્ય રાજકીય સંગઠનોનો સમાવેશ થાય છે.
લશ્કરી બળવા પછી 3000 થી વધુ નાગરિકો મૃત્યુ પામ્યાનો અંદાજ
ફેબ્રુઆરી 2021માં મ્યાનમારની સેનાએ તખ્તાપલટ કરીને દેશની સત્તા સંભાળી હતી. ત્યારથી દેશમાં સૈન્ય શાસન વિરુદ્ધ વિરોધ પ્રદર્શન થઈ રહ્યા છે. આ પ્રદર્શનોને ડામવા માટે સેના લોકો પર બળપ્રયોગ કરી રહી છે. સેનાની કાર્યવાહીમાં અત્યાર સુધીમાં 3,000 થી વધુ નાગરિકો માર્યા ગયા હોવાનો અંદાજ છે.
